Senegal

République du Sénégal (frz.) Réewum Senegaal (Wolof) Republik Senegal
Wahlspruch: „Un Peuple, Un But, Une Foi“ frz.: „Ei Volk, ei Ziil, ei Glaube“
Amtsspraach	Französisch
Hauptstadt	Dakar
Staatsoberhaupt	Bassirou Diomaye Faye
Regierigschef	Ousmane Sonko
Flächi	196.722 km²
Iiwohnerzahl	18.384.660 (2023)[1]
Bevölkerigsdichti	93,3 Iiwohner pro km²
Währig	CFA-Franc BCEAO
Unabhängigkeit	vu Frankrych am 20. Augschte 1960
Nationalhimne	Pincez Tous vos Koras, Frappez les Balafons
Zitzone	UTC
Kfz-Kennzeiche	SN
Internet-TLD	.sn
Vorwahl	+221

Dr Senegal (franzesisch République du Sénégal [seneˈgal]) isch e Staat z Weschtafrika. Är goht vu dr Uuslaifer vu dr Sahara im Norde, wu s Land an Mauretanie gränzt, bis zum tropische Fychtwald im Side, wu d Nochbere Guinea un Guinea-Bissau sin, un vu dr chiele Atlantikkischten im Weschte in di haiß Sahel-Region an dr Gränze zue Mali. Di sidlige Landesdail, d Casamance, wäre dur dr Chlaistaat Gambia abdrännt.

S Biet vum Senegal isch scho syt em 12. Johrhundert e Dail vu dr islamische Wält un au hite bekänne si iber 90 % vu dr 12 Millionen Yywohner vum Land zum Islam. Noodäm d Region vu mehrere afrikanische Rych beherrscht woren isch, isch si anne 1895 zuen ere franzesiche Kolony wore. Am 20. Augschte 1960 isch dr Senegal unabhängig wore. Är het e Meebarteiesischtem bhalte un isch zue aim vu dr wenige demokratische Staaten uf em afrikanische Kontinänt. D Abhängigkait vu wenige Exportgieter wie Ärdnuss, Phosphat un Fisch, e waidli Bevelkerigswachtsum un e hochi Staatsverschuldig hän ab dr 1980er Johr zuen ere Verarmig gfiert un zue all greßere soziale Spannige. Derzue sin ab 1982 Sezessionsbsträbige in dr Casamance chuu. Dr Senegal isch mit dr Zyt wäge däm abhängig wore vu Kredit vu dr Induschtry- un Ärdeelländer un vu Entwickligshilf.

1. ↑ CIA World Factbook Senegal