Thomas Alva Edison

Dr Thomas Alva Edison (* 11. Februar 1847 z Milan, Ohio; † 18. Oktober 1931 z West Orange, New Jersey) isch en amerikanische Erfinder und Undernäämer gsi. Er het sich bsundrigs mit Elektrizideet und Elektrotechnik befasst. Sini Erfindige si mäistens guet aachoo uf em Määrt und er het e ganzes Süsteem vo Stroomerzüügig, Stromverdäilig und innovative elektrische Konsumbrodukt mirenander verbunde. Im Edison sini grundlegende Erfindige und Entwigglige in de Beriich vom elektrische Liecht, vo dr Telekommunikazion und vo de Medie für Doon und Bild häi e groosse Iifluss uf die allgemäini technischi und kulturelli Entwigglig ghaa. In spöötere Joor sin em wichdigi Entwigglige in dr Verfaarenstechnik für d Beriich vo dr Chemie und vom Zemänt glunge. Si Organisazioon vo dr industrielle Forschig het d Entwiggligsarbet vo spöötere Undernääme beiiflusst.

D Läistig vom Edison bi dr Elektrifizierig vo Nöi York und dr Iifüerig vom elektrische Liecht markiert dr Aafang vo dr umfassende Elektrifizierig vo dr industrialisierte Wält. Die epochali Veränderig isch bsundrigs mit sim Naame verbunde.