Adchectivo

L'adchectivo (d'o latín: adiectīvus, "que s'adhibe") ye una parte d'a oración u clase de parola que complementa un substantivo para cualificar-lo; expresa caracteristicas u propiedaz atribuidas a un substantivo, ya sían concretas (perceptible por os sentius, como que en o libro gran u the big book) u abstractas (cognoscible por a mente, como que en o libro dificil). Istos adchectivos acompanyan a o substantivo (libro, book) y cumplen a función d'especificar u resaltar beluna d'as suyas caracteristicas.

En gramatica tradicional se gosaba distinguir entre adchectivos cualificativos y adchectivos determinativos; manimenos actualment para istos zaguers se gosa usar a parola determinant entre que que a parola adchectivo se reserva para os adchectivos cualificativos.

Se distinguen dos funcions d'un adchectivo respective a un nombre: d'uns se diz que lo determinan, pus, en adhibir un adchectivo por eixemplo ya no se charra de cualsiquier libro, sino precisament d'un libro verde; istos son os adchectivos especificativos u restrictivos. Por unatro costau l'adchectivo puede utilizar-se para describir a o substantivo pero sin distinguir-lo d'atros, por eixemplo a verda hierba (si no se contrasta con hierbas d'atras colors); se charra en iste caso d'adchectivo explicativo u no restrictivo; iste tipo ye mas común en literatura y poesía.

En as luengas flexivas, ye común que l'adchectivo tienga as mesmas flexions que o substantivo, tals como chenero, numero u caso; pero no siempre ye asinas, por eixemplo en anglés o nombre tiene numero (singular u plural) pero l'adchectivo no.