Alfred Hitchcock

Alfred Hitchcock
Alfred Hitchcock en 1956.
Información personal
Nombre real	Alfred Joseph Hitchcock
Calendata naiximiento:	13 d'agosto de 1899
Puesto naiximiento:	Leytonstone (Londres, Reino Uniu)
Calendata muerte:	29 d'abril de 1980
Puesto muerte:	Los Angeles (California, Estaus Unius)
Ocupación:	Director cinematografico, actor, productor cinematografico y guionista
Conchuche:	Alma Reville (1926-1980)
Fillos:	Patricia Hitchcock

Alfred Joseph Hitchcock, naixiu de Leytonstone (Londres, Reino Uniu) o 13 d'agosto de 1899 y muerto en Los Angeles (California, Estaus Unius) o 29 d'abril de 1980, estió un director cinematografico, actor, productor y guionista estausunidense d'orichen britanico, activo en o cine britanico (y dimpués en o cine estausunidense) dende primerías d'os anyos 1920, que ye considerau uno d'os prencipals directors d'a Historia d'o Cine. Con una important producción en o cine d'intriga, Hitchcock gosa ser dito o mago d'o suspenso. Mai no recibió o Premio Oscar a o Millor Director, pero gosa estar considerau como lo millor director cinematografico de toz os tiempos.^[1]

Inició la suya carrera en o suyo país natal, en primeras en o cine mudo y dimpués en o cine sonoro, con a-saber-lo exito, ta dimpués marchar a treballar en os Estaus Unius, a on desembolicó a mayor parte d'a resta d'a suya carrera cinematografica. En a suya obra se puet trobar, amás d'un elemento d'intriga u de suspenso, una miqueta d'humor. Una atra d'as suyas caracteristicas estió la de poseyer un amplo sentito de l'auto-promoción; un eixemplo d'isto zaguero ye que en todas as suyas cintas gosa fer un cameo, ye decir, una chicota aparición, que s'ha convertiu en uno d'os prencipals signos distintivos d's suyas cintas.

D'entre a suya muit ampla filmografía, se puet destacar bellas cintas, como Murder! (1930, con Herbert Marshall y Norah Baring), The 39 Steps (1935, con Robert Donat, Madeleine Carroll, Lucie Mannheim y Godfrey Tearle), The Lady Vanishes (1938, con Margaret Lockwood, Michael Redgrave y Paul Lukas), Jamaica Inn (1939, con Charles Laughton, Maureen O'Hara y Emlyn Williams), Rebecca (1940, con Laurence Olivier, Joan Fontaine y Judith Anderson), Suspicion (1941, con Joan Fontaine, Cary Grant, Cedric Hardwicke, Nigel Bruce y May Whitty), Notorious (1946, con Ingrid Bergman, Cary Grant y Claude Rains), I Confess (1953, con Montgomery Clift, Anne Baxter, Karl Malden y Brian Aherne), Dial M for Murder (1954, con Ray Milland, Grace Kelly y Robert Cummings), Vertigo (1958, con James Stewart, Kim Novak y Barbara Bel Geddes), North by Northwest (1959, con Cary Grant, Eva Marie Saint y James Mason), Psycho (1960, con Anthony Perkins, Vera Miles, John Gavin y Janet Leigh), The Birds (1963, con Tippi Hedren, Rod Taylor, Jessica Tandy, Suzanne Pleshette y Veronica Cartwright), u Topaz (1969, con Frederick Stafford, Dany Robin, Claude Jade, Michel Subor u John Forsythe).

1. ↑ (en) John W. Whitehead: Alfred Hitchcock Never Won an Oscar: Go Figure, The Rutherford Institute, 21 de febrero de 2011.