Chuegos Olimpicos

Os Chuegos Olimpicos (en griego Ολυμπιακοί Αγώνες, en francés Jeux Olympiques y en anglés Olympic Games) son un escaicimiento esportivo internacional celebrato mientres os zaguers quince días d'un periodo de cuatre anyos dito Olimpiada. Se tracta d'un important escaicimiento que requiere preparativos previos por part d'o país organizador con un important esforzada economica, en o que participan mils de personas entre esportistas y lo suyo personal auxiliar y que ye retransmitiu por a mayor parte d'os medios de comunicación de toz os países, amenistando-se tamién acullir a los periodistas que los representan.

Encetatos orichinalment en l'antiga Grecia, fuoron recuperatos por o barón de Coubertin en zaguerías d'o sieglo XIX, inspirando-se en l'esprito d'os antigos chuegos. Os primers chuegos d'a era moderna s'organizoron en Atenas en 1896. Actualment se celebran os Chuegos Olimpicos de verano cada cuatre anyos en os anyos multiplos de cuatre, y os Chuegos Olimpicos d'hibierno tamién cada cuatre anyos, en os atros anyos parelos no multiplos de cuatre. Os primers Chuegos Olimpicos d'hibierno se facioron en Chamonix (Francia) en 1924.

Como consecuencia d'o transcorrer d'o tiempo, en os mas de cient anyos d'historia d'os Chuegos y d'o movimiento olimpico s'han produciu cambios constants en a suya estructura y organización, con una constant expansión d'o numero d'esportes olimpicos y de prebas d'istos esportes (complementaus mientres muitos anyos con esportes de demostración), amás de fixar unos requisitos minimos en cuasi todas as prebas ta limitar o numero creixent d'esportistas participants. Tamién ha desapareixiu la ideya de Coubertin de que toz os esportistas participants en os Chuegos estasen "amateurs", ye decir, que no recibisen garra sueldo, recompensa u cualsiquier tipo de remuneración por a suya actividat esportiva, ideya que sí se trobaba present en as primeras edicions d'os Chuegos.^[1]

Nomás bi habió interrupcions en a organización d'os Chuegos cuan istos coincidioron con grans guerras, por a I Guerra Mundial no se podioron organizar os Chuegos de Berlín 1916, os de Tokio 1940, por a guerra chino-chaponesa, y se substituyoron Helsinki 1940 que tampoco podioron fer-se por a II Guerra Mundial; istas mesmas guerras tamién impidioron fer os Chuegos Olimpicos d'hibierno de 1940. D'atra man, en a historia d'os Chuegos tamién ha habiu boicots, dopache, terrorismo y subornos.

Dende l'anyo 1960 tamién bi ha uns Chuegos Paralimpicos, ta os atletas con bella disminución fisica u psiquica, y dende 1976 uns Chuegos Paraolimpicos d'Hibierno ta que istos mismos atletas participen en esportes d'hibierno.

O creiximiento de l'olimpismo ha feiro creixer una estructura organizativa d'o movimiento olimpico que actualment se concreta en federacions esportivas internacionals, comités olimpicos naionals y comités especificos ta cada edición d'os Chuegos. O Comité Olimpico Internacional (COI) ye l'organismo que prene las decisions, por eixemplo la ciudat a qui s'adchudica una edición d'os Chuegos y que estará qui habrá d'organizar y financiar ixa edición, amás de decidir qué esporte tiendrá la condición d'esporte olimpico en ixa edición. Asinas, actualment participan en una edición d'os Chuegos, entre los de verano y los d'hibierno, aproximadament 13.000 esportistas que compiten en 33 esportes diferents con un total de cuasi 400 prebas concretas.

Finalment, s'ha desenrollau toda una serie de simolochía y rituals asociaus a los Chuegos, como por eixemplo los asociaus a la entorcha olimpica, la bandera olimpica u la ceremonia d'os Chuegos con actos d'ubertura y clausura y con a forma d'entregar a los esportistas as medallas d'oro (ta lo ganador d'a preba), archent (ta lo segundo clasificau) y bronce (ta lo tercer clasificau).

1. ↑ (es) ¿Fin del amateurismo en los JJ.00.? en a revista Acción, 11 d'abril de 2024.