Back فول ميتال جاكيت (فيلم) Arabic فل ميتال چاكيت ARZ Суцэльнаметалічная абалонка BE Пълно бойно снаряжение Bulgarian ফুল মেটাল জ্যাকেট Bengali/Bangla Full Metal Jacket Catalan Full Metal Jacket CEB Olověná vesta Czech Full Metal Jacket CY Full Metal Jacket Danish
.svg){kind=small}
Full Metal Jacket (títol orichinal en anglés, en aragonés A chaqueta completament metalica, enguerada en Aragón con o suyo títol traduciu enta lo castellano como La chaqueta metálica, en aragonés A chaqueta metalica) ye una cinta de cine de drama belico de l'anyo 1987 coproducida por o cine estausunidense y lo cine britanico dirichida por Stanley Kubrick seguntes un guión adaptau por o mesmo Stanley Kubrick, Michael Herr y Gustav Hasford (basau en The Short-Timers, una novela parcialment autobiografica publicada por iste zaguero en 1979), con una banda sonora orichinal d'Abigail Mead, una dirección de fotografía de Douglas Milsome y una producción cinematografica de Stanley Kubrick ta las productoras Natant, Harrier Films y Stanley Kubrick Productions. De l'elenco d'actors d'a cinta fan parte, entre d'atros, Matthew Modine, Vincent D'Onofrio, Lee Ermey, Dorian Harewood, Arliss Howard, Kevyn Major Howard, Ed O'Ross, John Terry, Kieron Jecchinis, Bruce Boa, Kirk Taylor, John Stafford y Tim Colceri.
Full Metal Jacket se centra en a historia d'un grupo de recrutas de l'United States Marine Corps dende que dentran en un campo d'adietramiento dica que marchan destinaus a la guerra de Vietnam, estando la cinta dividida en dos etapas: a primera se centra en a suya vida de recrutas en Parris Island en Carolina d'o Sud amostrando lo proceso de condicionamiento d'os recrutas y cómo no toz son capables de soprtar a presión psicolochica que suposa, a traviés d'o sarchento Hartman, que lis fa una gran presión, y la segunda etapa se centra en a suya vida en Vietnam en plena ofensiva d'o Tet, mas que mas en a batalla de Huế en l'antiga ciudat de Huế. A cinta s'ambienta asinas en Carolina d'o Sud, Da Nang y Huế en os anyos 1967 y 1968 y la suyas escenas se filmoron en o Gran Londres, Cambridgeshire, Essex, Kent Lincolnshire y Norfolk, amás d'en os Pinewood Studios en Buckinghamshire, toz éls condaus d'Anglaterra, y en a ciudat tamién anglesa de Londres.[2]
Ye una cinta que ha recibiu cuantos premios y nominacions, en destacando una nominación a los Premios Oscar en a suya 60ena edición (Millor Guión Adaptau), dos nominacions a los Premios BAFTA (Millor Soniu y Millors Efectos Especials) en a suya 41ena edición, un Premio David de Donatello (Millor Productor Forano) en a suya 33ena edición y una nominación a los Premios Globos d'Oro a lo Millor Actor Segundario en a suya 45ena edición.