Sistema Internacional d'Unidaz

O Sistema Internacional d'Unidaz, abreviau SI^[1] (d'o francés Système International d'Unités) ye lo sistema d'unidaz mas emplegau en o mundo, tanto en a ciencia como en a vida diaria (comercio), y ye la evolución d'o sistema metrico decimal.

L'antigo sistema metrico decimal presentaba diferents grupos d'unidaz como lo sistema mks (metro-quilogramo-segundo) u o sistema cgs (centimetro-gramo-segundo), que a la vegada tamién presentaban variants. O SI se desembolicó a partir de l'antigo sistema mks, y fue adoptato en a 11^ena Conferencia Cheneral de Pesos y Mesuras que se celebró en a ciudat de París entre l'11 y lo 20 d'octubre de 1960.

Como se puet observar en o mapa d'o costau, hue en día la utilización d'o SI ye practicament universal y cuasi dengún estau mantiene definicions oficials d'atras unidaz. A unica excepción notable son os Estaus Unius d'America a on que lo suyo sistema tradicional d'unidaz (United States customary units) contina estando amplament emplegau en a vida diaria, encara que con definicions basadas en o SI. L'uso d'o SI en os Estaus Unius nomás s'incrementa en a escuela, a ciencia y a industria.^[2]

1. ↑ Nombre y abreviadura oficials seguntes a resolución num. 12 d'a 11^ena Conferencia Cheneral de Pesos y Mesuras de 1960.
2. ↑ CIA. World Factbook. 2008.