Back الرجل الهادئ Arabic الرجل الهادئ ARZ ساکیت آدام AZB Тихият човек Bulgarian The Quiet Man BR The Quiet Man Catalan The Quiet Man CY Den tavse mand Danish Der Sieger (1952) German Ο ήσυχος άνθρωπος Greek
.svg){kind=small}
The Quiet Man (títol orichinal en anglés, en aragonés L'hombre tranquilo, enguerada en Aragón con o suyo títol traduciu enta lo castellano como El hombre tranquilo) ye una cinta de cine estausunidense de cine de comedia dramatica romantica enguerada l'anyo 1952, dirichida por John Ford seguntes un guión adaptau por Frank S. Nugent (basau en The Quiet Man, un relato curto publicau por Maurice Walsh en 1933), con una banda sonora orichinal de Victor Young, una dirección de fotografía de Winton C. Hoch y una producción cinematografica de John Ford y Merian C. Cooper ta las productoras Republic Pictures y Argosy Pictures. Conta con un elenco d'o cual en fan parte, entre d'atros, os actors John Wayne, Maureen O'Hara, Barry Fitzgerald, Victor McLaglen, Ward Bond, Mildred Natwick, Francis Ford, Arthur Shields, Eileen Crowe, Charles B. Fitzsimons, James Lilburn, Séan McClory, Emily Eby, Jack MacGowran y May Craig.
En os anyos 1920 plega en Irlanda Sean Thornton. Ye un boxiador que ha dixau o boxeyo dimpués de matar accidentalment a un adversario en un combat, y torna en a isla ta mercar a chicota caseta a on i heba naixiu d'antes mas. En plegar en o lugar, s'informa y se li diz que ixa casa ye propiedat d'una cabalera vidua d'o lugar, y marcha enta ella ta fer-le una oferta. Tanimientres, Will Danaher tamién ye intresau en ixa propiedat, que muga con as suyas propias propiedaz, y fa una contraoferta dabant d'a vidua, que tampoco no quereba vender. Pero como Will insinúa un posible intrés sentimental d'ella ta no vender as tierras, la vidia decide acceptar la oferta de Sean, que se converte asinas en enemigo de Will. A la vegada, Sean ha conoixiu a Mary Kate Danaher, a chirmana roya de Will, y s'ha enamorau d'ella, mesmo que ella d'él. Sean contracta los servicios de Michaeleen Óge Flynn ta que faga de casamentero, pero Will refusa la oferta, ta decepción de Sean y de Mary Kate. En veyer que toz dos sufren, o mosén catolico d'o lugar decide colaborar en una trapaza con atros habitants d'o lugar ta fer pensar a Will que si la viudua l'ha refusau siempre yera porque en a suya casa ya i heba una atra muller, a suya chirmana, y que si ista se casa ya no tiendrá garra problema con a vídua. Alavez, Will accepta la voda de Sean y Mary Kate, pero en rematar a ceremonia conoix que l'han enganyau y, en considerar que Sean ha participau en a trapaza, se niega a entregar la dote d'a novia. Mary Kate li diz a Sean que mai no será la suya muller dica que no cobre la dote, que incluye diners y bels muebles d'a familia, i ixo emponzonya la relación entre toz dos, porque Sean no quiere una baralla con Will en temer que puede matar-lo como mató a l'atro boxiador, y tiz os habitants d¡o lugar, incluyida Mary Kate, creyen que simplament tien medrana de luitar con Will. Pero cuan fnalment cobra los diners d'a dote y marcha a cremar-los en una caldera, ye Mary Kate qui li ubre la puerta ta que los creme. Y, en ixemesmo momento, ha de barallar-se con Will.
A cinta s'ambienta en Irlanda mientres os anyos 1920 y las suyas escenas se filmoron en Cong en o condau de Maigh Eo y en o condau de Gaillimh (incluyius Oughterard, Galway, Clifden y Tuam) en Irlanda, amás d'en os Republic Studios en Los Angeles en California, en os Estaus Unius.[2]
Recibió cuantos premios y nominacions, en destacando dos Premios Oscar (a la Millor Fotografía y a lo Millor Director), amás d'atras cinco nominacions (Millor Cinta, Millor Actor Segundario, Millor Disenyo de Producción, Premio Oscar a lo Millor Soniu y Millor Guión Adaptau) en a suya 25ena edición, y dos nominacions a los Premios Globos d'Oro (Millor Director y Millor Guión) en a suya 10ena edición.