Gran Moravia

	estáu desapaecíu
Alministración
Capital	Veligrad (es)
Forma de gobiernu	patrimonialismo (es)
Llingües oficiales	Antiguu eslavu eclesiásticu
Xeografía
Coordenaes	49°36′12″N 18°09′10″E / 49.60340269°N 18.15281961°E
Llendaba con	Primer Imperiu búlgaru y Francia Oriental

Gran Moravia (checu: Velká Morava; llatín: Magna Moravia) foi un imperiu medieval de la Europa central desenvueltu ente'l 833 y el sieglu X, constituyendo la primer realidá estatal que se forxó ente los antepasaos de checos, moravos y eslovacos. El nucleu territorial del imperiu foi'l ríu Morava, güei na República Checa y Eslovaquia, y na so espansión llegó a tomar zones de les modernes Hungría, Rumanía, Polonia, Austria, Alemaña, Serbia, Eslovenia, Croacia y Ucraína.

La Gran Moravia foi fundada pol príncipe de Moravia, Mojmír I, en sometiendo en 833 al Principáu de Nitra y axuntar la rexón so un mesmu tronu. Esperimentó un desenvolvimientu cultural ensin precedentes pola obra evanxelizadora de Cirilo y Metodio mientres el reináu del príncipe Ratislav I en 863. L'imperiu algamó la so máxima estensión territorial col gobiernu de Svatopluk I.

Debilitáu poles lluches internes y problemes fronterizos colos francos, l'Estáu moravo nun aguantó la invasión maxar del sieglu X, desmembrándose en partes controlaes pol ducáu de los polacos (base del futuru reinu de Polonia), el Gran Principáu d'Hungría y el Sacru Imperiu Romanu Xermánicu. Les árees ocupaes por esti postreru fueron rápido feudalizadas, surdiendo Estaos como'l ducáu de Bohemia y la marca de Moravia.

La Gran Moravia dexó tres de sí un fondu legáu cultural, compuestu por castiellos y ciudaes que sobrevivieron a la invasión, según pol alfabetu glagolíticu y l'antiguu idioma eslavu usáu na lliturxa, espublizaos ente otros pueblos eslavos.