Helipuertu

Un helipuertu ye un pequeñu aeropuertu solamente válidu pa helicópteros. Los helipuertos pueden tener una o más plataformes d'aterrizaxe (helisuperficie) y suelen tener unos servicios más llindaos de combustible, llume o hangares. Nes grandes ciudaes suel haber helipuertos pa servicios de tresporte, servicios d'emerxencia, empreses etc. Xeneralmente los helipuertos tán asitiaos más cerca del centru de la ciudá que los aeropuertos, dándo-yos ventayes en términos de tiempu de viaxe en destinos urbanos ya inclusive hasta l'aeropuertu de la ciudá.

Primeramente creíase que los helipuertos tendríen un gran desenvolvimientu, pero debíu al ruíu de los helicópteros los helipuertos urbanos nun se desenvolvieron muncho.

Un helipuertu ye muncho más pequeñu qu'un aeropuertu, yá que tán destinaos solo a operaciones con helicópteros (despeguen y aterricen verticalmente a diferencia de los aviones), por eso nun se precisa tantu espaciu (un "helipad" y contorna han tener pa maniobrar a lo menos el doble de tamañu qu'ocupa'l helicópteru). Cada vez ye más llarga la llista de centros sanitarios que disponen d'una plataforma, permitiendo treslladar mancaos al hospital con helicópteru medicalizáu. Tamién ye grande'l númberu d'helipuertos privaos nes grandes ciudaes y en rascacielos como Nueva York, São Paulo etc.

De normal la H qu'hai marcada na pista d'aterrizaxe, indica la direición d'averamientu del helicópteru, y polo tanto qué orientación va tener que llevar l'aparatu p'aterrizar. Un helipuertu amás de ser más pequeñu qu'un aeropuertu, nun tien tantes instalaciones al so alredor como les que tienen la mayoría d'aeropuertos, al contrariu los helipuertos tienen servicios llindaos como en dellos casos hangares pal almacenamientu y caltenimientu de los helicópteros, en dellos casos tanques de combustible pal so abastecimientu y lo que toos tienen de tener ye balices (lluces pa la nueche) y manga d'aire.