Imprentadora

Una imprentadora^[1] o impresora^[2] ye un dispositivu periféricu del ordenador que dexa producir una gama permanente de testos o gráficos de documentos almacenaos nun formatu electrónicu, imprentándolos en medios físicos, de normal en papel, utilizando cartuchos de tinta o teunoloxía láser (con tóner).

Munches de les imprentadores son usaes como periféricos, y tán permanentemente xuníes al ordenador por un cable. Otres imprentadores, llamaes imprentadores de rede, tienen una interfaz de rede interna (típicamente wireless o ethernet), y que puede sirvir como un dispositivu pa imprimir en papel dalgún documentu pa cualquier usuariu de la rede.

Amás, munches imprentadores modernes dexen la conexón direuta d'aparatos de multimedia electrónicos como les tarxetes CompactFlash, Secure Digital o Memory Stick, pendrives, o aparatos de captura d'imaxe como cámares dixitales y escáneres. Tamién esisten aparatos multifunción que consten d'imprentadora, escáner o máquines de fax nun solu aparatu. Una imprentadora combinada con un escáner puede funcionar básicamente como una fotocopiadora.

Son diseñaes pa realizar trabayos repetitivos de poco volume, que nun riquir virtualmente un tiempu de configuración pa consiguir una copia d'un determináu documentu. Sicasí, les imprentadores son xeneralmente dispositivos lentos (10 páxines per minutu ye consideráu rápido), y el gastu por páxina ye relativamente alto.

Pa trabayos de mayor volume esisten les imprentes, que son máquines que realicen la mesma función que les imprentadores pero tán diseñaes y optimizaes pa realizar trabayos d'impresión de gran volume, como sería la impresión de periódicos. Les imprentes son capaces d'imprimir cientos de páxines per minutu o más.

1. ↑ Esti términu apaez nel Diccionariu de l'Academia de la Llingua Asturiana. Ver: imprentadora
2. ↑ Esti términu apaez nel Diccionariu de l'Academia de la Llingua Asturiana. Ver: impresora