Back Septimanië AF Septimania AN سبتمانيا Arabic Септыманія BE Септимания Bulgarian Septimania BR Septimània Catalan Septimánie Czech Septimanien German Σεπτιμανία Greek
Septimania (en francés Septimanie, n'occitanu y catalán Septimània) ye una rexón histórica asitiada nel sur de l'actual Francia. El nome definía a la fastera occidental de la provincia romana de Galia Narbonense, que pasó a manes de los visigodos en 462, cuando Roma-y cedió la Septimania al rei visigodu Teodoricu II. La rexón foi tamién conocida colos nomes de Gallia, Arbuna o Narbonensis. El territoriu de Septimania corresponde aproximadamente col de l'antigua rexón alministrativa francesa de Languedoc-Rosellón, que foi integrada en 2016 na nueva rexón alministrativa d'Occitania. Septimania foi conquistada plos musulmanes nel sieglu VIII, y foi conocida col nome d'Arbuna demientres formó parte d'Al-Ándalus. La so pertenencia al emiratu de Córdoba, foi sicasí perbreve, y bien ceo foi conquistada polos francos, que pa finales del sieglu IX dáben-y el nome de Gothia o Marca Gótica (Marca Gothica).
Septimania convirtióse nuna marca del Imperiu carolinxu y dempués del reinu de Francia Occidental hasta'l sieglu XIII, magar que tou esti tiempu foi cultural ya políticamente autónoma del gobiernu central francés, asitiáu al norte del país. La rexón taba embaxu la influyencia de los condaos de Tolosa, Provenza y Barcelona, y formaba parte de la rexón cultural y llingüística d'Occitania, que comprendía'l terciu más meridional de l'actual Francia. La rexón foi finalmente puesta embaxu'l control efectivu de los reis de Francia a entamos del sieglu XIII como una consecuencia de la cruzada cátara, tres de la cual los reyes franceses entamaron a nombrar gobernadores de la rexón. Pa finales d'esi sieglu Septimania convirtiérase fomalmente na provincia real de Languedoc.
El nome "Septimania" parez derivase de parte del nome romanu de la ciudá de Béziers, Colonia Julia Septimanorum Beaterrae, asina nomada por tener sío llugar d'asentamientu de veteranos de la VII Llexón romana. Una hipótesis alternativa suxer que'l nome fai referencia a les siete ciudaes (civitates) qu'había nel territoriu: Béziers, Elne, Agde, Narbona, Lodève, Maguelonne, and Nimes. El territoriu septimanu estendíase, pel noroeste, hasta una llinia imaxinaria asitiada a metá de camín ente'l mar Mediterraneu y el ríu Garona; al este el ríu Ródanu facía-y de llende natural con Provenza, y al sur la so llende yeren los Pirineos.