El Zen ye una forma del Budismu Mahayana centrada na meditación o “illuminación interior” y que tien como carauterística más visible la práutica de la postura llamada zazen, por siguir una tradición que bilta na postura de meditación de Siddharta Gautama cuando algamó la illuminación baxo la ”figal Bodhi”, hai más de 2500 años na India.
La pallabra zen ye la pronunciación xaponesa del caráuter 禅, pronunciáu chán en chinu mandarín. La pallabra vien del sánscritu dhyāna (“concentración perfeuta”, “meditación”).
El zen en sentíu ampliu inclúi toles escueles derivaes del Chan chinu. Nesti sentíu ampliu’l zen prautícase sobre too en China, Xapón, Corea y Vietnam. Quiciabes seya tamién la forma de budismu más conocida y prauticada n’Occidente, anque más na so forma xaponesa, per aciu sobre too del llabor intelectual y divulgador de Daisetz Teitaro Suzuki y del más práuticu del maestru Taisen Deshimaru.