Tataramon na Italyano

An Italyano (Ingles: Italian) sarong tataramon na Romanse na tinataram mansana sa Europa, partikular sa Italya, Suisa, San Marino, Vaticano, asin kan mga minoriya sa Malta, Monako, Kroasya, Slovenia, Pranses, Libya, Eritrea asin Somalia. Igwa man mga imigranteng komunidad sa Amerika asin Australya na ini an saindang lenggwahe. Kadaklan kan mga parataram mga bi-lingual, na gamit an estandarteng Italyano asin ibang mga tataramon na rehiyunal.

Susog sa estadistika kan Union Europa, an Italyano tinataram nin 65 milyon katawo bilang enot na tataramon ninda (13% kan UE na populasyon), haros sa Italya mansana asin komo ikaduwang lenggwahe kan 14 milyon na tawo. Kun isasaro diyan an mga parataram Italiano sa bakong-Union Europang mga nasyon, arog kan Suisa asin Albanya, asin sa ibang kontinente pa, an total na bilang kani maabot sobra sa 85 milyon.^[1]

Sa Suisa, an Italyano saro sa opisyal na lenggwahe; ini inaadalan asin nanono'dan sa gabos na eskwelahan kan konpederasyon asin tinataram bilang enot na tataramon sa mga kanton Suisa nin Ticino asin Grigioni asin man kan dakul na numero nin mga imigrante sa mga kanton kun saen Aleman o Pranses an mayor na tataramon. An Italiano iyo man an opisyal na lengggwahe kan San Marino asin , siring man, kan syudad nin Vaticano. Ini kapwa oppisyal na tataramon sa Istria na parte kan Slovenia asin kan Istria County sa Kroasya. An lenggwahe na inadoptar kan estado kan an Italya nagkaboronyog na, pinasikad sa diyalekto nin Tuskany na dati (daa) tinataram sana kan mga alta sosyedad sa Florence. An pagtalubo kan Italiano naimpluwensya man na gayo kan lenggwaheng Aleman na dara kan mga tagasakyada sa imperyong Romano kan mga panahon.

1. ↑ Simone 2010