Reun ar Glev, pe Ronan ar Glev (René Le Gléau evit ar velestradurezh c'hall) a oa ur yezhour hag ur geriadurour brezhonek.
Ganet e oa bet e Lokournan e 1922 ha marvet eo e Brest d'ar 7 a viz Here 2008 da c'hwec'h vloaz ha pevar-ugent[1].
Ar brezhoneg e oa e yezh kentañ, yezh e dud, met meur a yezh all en deus studiet goude, peogwir eo bet o kelenn galleg, latin, gresianeg ha brezhoneg. Tapout a reas ar Certificat d’Aptitude au Professorat de l’Enseignement du Second degré (CAPES) war al lizhiri klasel ha dont da vezañ kelenner eil derez e Normandi da gentañ hag e Brest adalek 1966 betek 1987 pa'z eas war e leve. Ouzhpenn bezañ kelenner war al lizhiri klasel e voe ivez unan eus ar re a gelennas brezhoneg en eil derez e Brest.
War-lerc'h an Eil brezel-bed e voe unan eus ar re a yae da werzhañ levrioù brezhonek war ar marc'hadoù e Bro-Leon, evit ar gevredigezh Breuriezh al Levrioù Brezhonek (BALB). Goude-se e stagas da vat gant studiadennoù war geriaoueg hor yezh ha war hec'h ereadur. Ur marc'h-labour e oa ha dont a reas da vezañ unan eus ar gwellañ arbennigourien war ar brezhoneg. Kenlabourat a reas gant Strollad An Deskadurezh Eil Derez (SADED) er bloavezhioù 1960, da sevel kentelioù yezhadur.
E 1973 e voe embannet gantañ e Syntaxe du breton moderne. Er bloavezhioù 1990 e voe embannet gantañ Études syntaxiques bretonnes, adembannet e 1999 ha 2000. E oberenn anavezetañ eo e c'heriadur e dek levrenn anvet Dictionnaire classique français-breton, ma kaver miliadoù a skouerioù tennet eus skridoù brezhonek an XIXvet hag an XXvet kantved da ziskouez penaos implij ar gerioù.