Oceania

Oceania es un geografico region que ta comprende con Australasia, Melanesia, Micronesia y Polinesia. Abarcando con el maga oriental y occidental hemisferio, na el centro del oceanico hemisferio, estimao que ta conta Oceanía con un terrestre superficie de unos 9.000.000 maga cuadrao kilometros y un poblacion de alrededor de 44,4 maga millon na 2022. Na comparacion con el otro maga continente, Oceanía es el mas chico na terrestre superficie y el segundo menos poblao despues del Antartida.

Ta tene Oceania con un diverso mezcla de maga economia. Por un lado hay el maga altamente desarrollao y globalmente competitivo financiero mercao de Australia, Frances Polinesia, Hawaii, Nueva Caledonia y Nueva Zelanda, con un bueno calidad de vida y altamente posicionao na el Indice de Humano Desarrollo. Por otro lado hay el mucho menos desarrollao pais de Kiribati, Papua Nueva Guinea, Tuvalu, Vanuatu y Occidental Nueva Guinea. Ademas ta inclui el region con el mediano economia del maga isla del Pacifico como Fiji, Palau y Tonga. El mas grande y mas poblao pais na Oceania es Australia, y el mas grande ciudad es Sidney, Puncak Jaya na el provincia de Papua Pegunungan na Indonesia es el mas alto pico na Oceania a 4,884 m.

Hace mas de 60,000 maga año que ya llega el maga primero poblador de Australia, Nueva Guinea y el maga gran isla justo al este. Na el aca-16 siglo ta ocurri el primero exploracion del Pacifico por parte del maga europeo. Ya alcanza el maga portugues explorador, entre 1512 y 1526, al maga isla Tanimbar, a cuanto maga isla Carolina y el oeste de Nueva Guinea. Ya segui el maga español y holandes explorador, luego el maga britanico y frances. Durante el de suyo primer viaje na el aca-18 siglo, ya navega si James Cook (que mas tarde ya llega al maga altamente desarrollao archipielago de Hawai) a Tahiti y por primera vez ya segui con el costa este de Australia.

Significativamente ya cambia el llegada del maga europeo na maga subsiguiente siglo con el social y político panorama de Oceania. Ya mira el Pacifico teatro durante el Primero Mundial Guerra, con el maga japones ocupando con manada aleman territorio. Durante el Segundo Mundial Guerra, ya lucha el maga Aliao (mas especificamente el Estados Unidos, el Filipinas —na aquel entonces un americano mancomunidad— y Australia) contra el Potencia del Eje Japón na vario maga lugar de Oceania.

El rupestre pintura del maga australiano aborigen es el mas largo artistico tradicion del mundo. El mayoria del maga pais de Oceania son maga multipartidista, representativo, parlamentarismo democracia, el turismo siendo un gran fuente de maga ingreso para el maga insular nacion del Pacífico.