| Enghraifft o'r canlynol | genre mewn ffilm  |
|---|---|
| Math | ffuglen gyffro seicolegol, ffilm gyffro, ffilm seicolegol |
Genre ffilm sy'n cyfuno stori gyffro â themâu seicolegol yw ffilm gyffro seicolegol. Mae ffilmiau o'r fath yn canolbwyntio ar agweddau meddyliol ac emosiynol y cymeriadau, ac yn archwilio'u hofnau, obsesiynau, a chroestyniadau mewnol, gan greu tensiwn yn y stori ac ennyn ias a chyffro yn y gynulleidfa.
Mae plotiau cyffro seicolegol yn aml yn ymwneud â "gemau'r meddwl", megis twyll a chelwydd, dibwyllo, a chamdriniaeth seicolegol. Mae cymeriadau'n defnyddio tactegau seicolegol i reoli a thanseilio'i gilydd, ac yn aml mae'r gynulleidfa ei hun yn anymwybodol o'r safbwynt sydd yn wir, gan greu ansicrwydd a phryder. Gall y prif gymeriad fod yn esiampl o adroddwr annibynadwy. Mae hynt anrhagweladwy y ffilm yn aml yn cynnwys troeon yn y stori a datgeliadau annisgwyl.
Mae'r ffilm gyffro seicolegol yn un o is-genres y ffilm gyffro. Ceir mathau eraill o ffilmiau seicolegol hefyd, gan gynnwys y ffilm arswyd seicolegol.