Sissy Spacek

La Mary Elizabeth Spacek, cgnusùda méj cuma Sissy Spacek (Quitman, 25 ad Dicémbar dal 1949), l'è n'atōra americàna dvintàda famóśa par la sò part in dal film Carrie, lo sguardo di Satana ad Brian De Palma in dua l'è stada numinàda p'r al Prèmi Òscar cuma atōra prutagunìsta. L'à pò purtâ a cà la statva sinc an dòp cun la pelìcula La ragazza di Nashville dal 1981.

L'è spuśàda c'n al regìsta Jack Fisk, la gh'à dū fiōli e l'è rósa 'd cavìi.

Nada al dè ad Nadâl dal 1949, la Spacek la crés in Tèxas cun la sò famìja ch'la la ciamàva Sissy. Da ragasōla la patìs la mòrt dal sò fradèl grand Robbie purtâ via da la leucemìa. Dòp avér tòlt al diplòma la partìs par New York par far caréra in dal mónd dal spetàcul. Dòp na part pìcula in dal film Trash (Rusc) ad Paul Morrissey, minga 'rcgnusùda, la gira 'l sò prim film in dal 1972, Arma da taglio (Arma da taj), cun Lee Marvin e Gene Hackman. 'L an dòp l'è la vòlta ad La rabbia giovane (L'arlìa śōvna), al prim film ad Terrence Malick ma 'l ciòc par lē a riva dabòṅ c'n al film ad scarésa Carrie, lo sguardo di Satana (Carrie, l'uciàda 'd Sàtana), n'òpra ch'la pòrta dimóndi furtùna anc al regìsta Brian De Palma e a 'l aṿtōr dal rumànś uriginàł, Stephen King. La Spacek la và a 'n pas da 'l Òscar ma la statva a riva listés in dal 1981 quànd l'è la prutagunìsta dal film La ragazza di Nashville (La ragàsa 'd Nashville) ad Michael Apted.

A la fiṅ di an Utànta la rèsta da piò a cà par star cun la sò famìja. Oliver Stone al la sarnìs par JFK - Un caso ancora aperto (JFK - Un caś incóra vèrt) dal 1991 e siē an dòp la lavóra cun David Lynch e 'l sò Una storia vera (Na stòria véra). In dal 2004 la tōś part a Una casa alla fine del mondo (Na cà a la fiṅ dal mónd) insém a Colin Farrell, pò la tórna a i film ad scarésa cun The Ring 2 (’L anèl 2) 'd Hideo Nakata.

• 1972 - Arma da taglio (Prime Cut), regìa ad Michael Ritchie
• 1973 - Nuovo anno, nuovo amore (Ginger in the Morning), regìa ad Gordon Wiles
• 1973 - La rabbia giovane (Badlands), regìa ad Terrence Malick
• 1976 - Welcome to L.A., regìa 'd Alan Rudolph
• 1976 - Carrie, lo sguardo di Satana (Carrie), regìa ad Brian De Palma
• 1977 - Tre donne (3 Women), regìa ad Robert Altman
• 1980 - La ragazza di Nashville (Coal Miner's Daughter), regìa ad Michael Apted
• 1981 - Lontano dal passato (Raggedy Man), regìa ad Jack Fisk
• 1982 - Missing - Scomparso (Missing), regìa ad Costa-Gavras
• 1984 - Il fiume dell'ira (The River), regìa ad Mark Rydell
• 1984 - Terrore in sala (Terror in the Aisles), regìa 'd Andrew J. Kuehn
• 1985 - Una donna, una storia vera (Marie), regìa ad Roger Donaldson
• 1986 - Una finestra nella notte ('night, Mother), regìa ad Tom Moore
• 1986 - Crimini del cuore (Crimes of the Heart), regìa ad Bruce Beresford
• 1986 - Le violette sono blu (Violets Are Blue), regìa ad Jack Fisk
• 1990 - La lunga strada verso casa (The Long Walk Home), regìa ad Richard Pearce
• 1991 - Un marito di troppo (Hard Promises) regìa ad Martin Davidson
• 1991 - JFK - Un caso ancora aperto (JFK), regìa 'd Oliver Stone
• 1997 - Affliction, regìa 'd Alan Rudolph
• 1997 - Sbucato dal passato (Blast From The Past), regìa ad Hugh Wilson
• 1999 - Una storia vera (The Straight Story), regìa ad David Lynch
• 2001 - In the Bedroom, regìa ad Todd Field
• 2002 - Tuck Everlasting - Vivere per sempre (Tuck Everlasting), regìa ad Jay Russell
• 2004 - Una casa alla fine del mondo ( Home at the End of the World), regìa ad Michael Mayer
• 2005 - 9 vite da donna (Nine Lives), regìa ad Rodrigo García
• 2005 - The Ring 2 (The Ring Two), regìa ad Hideo Nakata
• 2005 - North Country - Storia di Josey (North Country), regìa dla Niki Caro
• 2005 - An American Haunting, regìa ad Courtney Solomon
• 2006 - Summer Running: The Race to Cure Breast Cancer, regìa ad Scott Mactavish
• 2006 - Gray Matters, regìa ad Sue Kramer
• 2007 - Hot Rod - Uno svitato in moto (Hot Rod), regìa 'd Akiva Schaffer
• 2008 - Lake City, regìa ad Hunter Hill e Perry Moore
• 2008 - Tutti insieme inevitabilmente (Four Christmases), regìa ad Seth Gordon
• 2010 - Get Low, regìa 'd Aaron Schneider
• 2011 - The Help, regìa ad Tate Taylor
• 2012 - Legami di sangue - Deadfall (Deadfall), regìa ad Stefan Ruzowitzky

• (EN) Filmugrafìa in s'l IMDb