Internacia Seminario

IS
Nomo	Internacia Seminario
Regiono	Germanio
Periodo	Jarfine
Organizanto	GEJ
Ekzistas ekde	1957
Celgrupo	Junularo kaj junaj familioj
Informa retpaĝo	IS-paĝo
Fota retpaĝo	bildoj.esperanto.de
v • d • r

Internacia Seminario (IS) estis ĝis 2009^[1] internacia junulara novjara Esperanto-renkontiĝo organizata de la Germana Esperanto-Junularo (GEJ) ĉiujarfine en malsama germana urbo, de la 27-a de decembro ĝis la 3-a de januaro. La lasta, 52-a IS 2008/2009, okazis en Biedenkopf, kun 138 partoprenintoj el 24 landoj^[2]; tio estis iom sub la kutimaj nombroj de la tri antaŭaj jaroj de ĉirkaŭ 180 partoprenantoj.^[3] Partoprenaj nombroj de 250 ĝis 300 la averaĝo de la 1980-aj kaj 1990-aj jaroj - la plej granda IS de 1986/87 havis 440 partoprenantojn. Ekde la jarŝanĝo 2009/2010 la Junulara E-Semajno anstataŭis la IS-n kiel ties kuniĝon kun la Ago-Semajno. La unuan IS organizis Richard Reuchlin kaj Uwe Joachim Moritz.

Krom prelegoj kaj diskutrondoj pri la kadra temo, programo de la Internacia Seminario ofertadis ankaŭ ĝeneralajn prelegojn, ekskursojn, koncertojn kaj aliajn distrajn programerojn (kiel ekzemple la tetrinkejo gufujo). Kulmino de la IS ĉiam estis la Silvestra Balo kun danckonkurso. Aparte menciindas la 10-a IS en Münster, kiam 10 profesoroj prelegis.

"Internacia Seminario" estis la oficiala nomo. Ĉar la renkontiĝo sufiĉe ŝanĝiĝis dum la jardekoj, precipe perdante sian puran seminarian karakteron, en la 1990-aj jaroj oni komencis en la germana nomi ĝin "Internationale Woche" ("Internacia Semajno").

1. ↑ Kunigo de IS kaj AS, ĉi-jare en Zakopane - JES!!!^{[rompita ligilo]} (oficiala komuniko pri JES de PEJ- kaj GEJ-Estraroj): "kunigon de IS kaj AS ... gvidos ĝin teamo de kvar spertuloj de ambaŭ pasintaj eventoj"
2. ↑ Laŭ IS-administrado, demandita je la 3a de januaro.
3. ↑ 2005/06: 174 homoj en Xanten; 2006/07: 206 homoj en Wewelsburg (50-a, jubilea IS); 2007/08: 180 homoj en Würzburg