Turdoj

Ne konfuzu ĉi tiun artikolon kun turto.

Turdoj
Masklo de Merlo
Biologia klasado
Regno: Animaloj Animalia Filumo: Ĥorduloj Chordata Klaso: Birdoj Aves Ordo: Paseroformaj Passeriformes Familio: Turdedoj Turdidae Genro: Turdus
Aliaj Vikimediaj projektoj
Sistematiko en Vikispecioj
Komunejo pri Turdoj
v • d • r

La veraj turdoj estas mezgrandaj ĉefe insektivoraj aŭ ĉiomanĝantaj birdoj de la genro Turdus de la familio Turdedoj. Reprezentantaj tipaj estas la Kantoturdo (Turdus philomelos), la Merlo (Turdus merula), la Griza turdo (Turdus pilaris), la Rubandoturdo (Turdus torquatus) kaj la Argilkolora turdo (Turdus grayi).

Ĉar tiu genro estas la tipa genro ene de la familio, la vorto “turdo” uzeblas ankaŭ por aludi la membrojn de tiu familio. En mala direkto, ĉar la specio de la Kantoturdo (Turdus philomelos) estas unu el la plej konataj kaj disvastigataj, foje oni uzas la terminon por aludi tiun precizan specion.

Tiu genro havas tutmondan distribuadon, kun specioj en Ameriko, Eŭropo, Azio, Afriko kaj Aŭstralio. Kelkaj specioj koloniigis kelkajn oceaniajn insulojn, kaj du specioj estis enmetitaj en Novzelando. Kelkaj specioj estas migrantaj.

Dum kelkaj specioj estis forigitaj el la genro Turdus, la du malgrandaj turdoj, iam separataj en la genro Platycichla de multaj fakuloj, estas kutime lokataj nuntempe en tiu ĉi genro denove.