Instrumentu elektroniko

Instrumentu elektroniko
Deskribapena
Mota	electrophone (en) , electronic instrument (en) eta musika tresna
Hornbostel-Sachs sailkapena	53

Musika-tresna elektronikoa zirkuitu elektronikoen bidez soinua sortzen duen musika-tresna da. Instrumentu hauek audio seinale elektriko, elektroniko edo digital baten ekoizpenari esker entzuten dira. Azken finean, bozgorailu baten mintzari eragiten dion potentzia-anplifikadore batera konektatzen da, interpreteak eta entzuleak entzuten duten soinua sortuz.^[1]

Tresna elektroniko batek soinua kontrolatzeko erabiltzaile-interfaze bat izan dezake, normalean nota bakoitzaren tonu-altuera, maiztasuna edo iraupena doituz. Teklatu elektroniko batek seinale bat bidaltzen du sintesi-modulu batera, ordenagailura edo soinua sortzen duen soinu elektroniko edo digitaleko beste sorgailu batera. Hala ere, gero eta ohikoagoa da erabiltzailearen interfazea eta soinua sortzen duten funtzioak bereiztea, kontrolagailu bat (sarrerako gailua) eta sintetizadore musikal bat osatzen baitute, hurrenez hurren, eta bi gailuak musika-exekuzioa deskribatzeko lengoaia baten bidez komunikatzen dira, hala nola MIDI edo Open Sound Control ^[2].

Musika-tresna elektroniko guztiak audio-seinalea prozesatzeko aplikazioen azpimultzotzat har daitezke. Musika-tresna elektroniko errazak soinu-efektu gisa ezagutzen dira batzuetan; soinu-efektuen eta benetako musika-tresnen arteko muga ez da oso argia normalean.

2010eko hamarkadan, musika-tresna elektronikoak musika-estilo gehienetan erabiltzen dira. Pop musikaren estiloen barruan, hala nola dantza elektronikoaren musikaren barruan, grabazioetan erabiltzen diren soinu instrumental ia guztiak instrumentu elektronikoak dira (adibidez, baxu sintetikoa, sintetizadorea edo erritmo-makina). Musika-tresna elektroniko, kontrolatzaile eta sintetizadore berrien garapenak garapen-eremu oso aktiboa eta diziplinartekoa izaten jarraitzen du. Hitzaldi espezializatuak antolatzen dira, Musika adierazpenerako interfaze berriei buruzko nazioarteko konferentzia nabarmenduz, azken lanak ezagutarazteko eta musika-tresna elektroniko, kontrolatzaile eta sintetizadore berriekin musika interpretatzen edo sortzen duten artistak ezagutzera emateko plataforma bat eskaintzeko.

Instrumentu elektrofonoak dira Sachs-Hornbostel sailkapenean sartu den azken familia^[3], 1940an gutxi gorabehera.

Instrumentu mekaniko-elektrikoak edo elektromekanikoak soinua sortzeko elementu mekanikoak eta elektrikoak nahasten dituzten musika-tresnak dira, Hammond Organoa edo Melotron, adibidez.

1. ↑ musikazorrotza. (2013-03-06). «INSTRUMENTU ELEKTROFONOAK» MUSIKA GELAN (Noiz kontsultatua: 2022-02-14).
2. ↑ Reinhard., Schmitz,. (2001). MIDI. Wise Publications in association with Wizoo ISBN 0-7119-9619-9. PMC 50713358. (Noiz kontsultatua: 2022-02-27).
3. ↑ Lee, Deborah. (2020). «Hornbostel-Sachs Classification of Musical Instruments» KNOWLEDGE ORGANIZATION 47 (1): 72–72.  doi:10.5771/0943-7444-2020-1-72. ISSN 0943-7444. (Noiz kontsultatua: 2022-02-27).