Walt Disney Animation Studios

Walt Disney Animation Studios
algemien
hist. namme	Disney Brothers Cartoon Studios    (1923-1926) Walt Disney Studio (1926-1929) Walt Disney Productions (1929-1985) Walt Disney Feature Animation    (1985-2007)
nasjonaliteit	Amerikaansk
type	privaat
sektor	filmstudio (tekenfilms)
haadkertier	Burbank (Kalifornje)
oprjochte	1923
oprjochter	Walt Disney Roy O. Disney
eigner	The Walt Disney Company
mem	The Walt Disney Studios
sifers
aktyf yn	de Feriene Steaten
wurknimmers	>800
offisjele webside
www.disneyanimation.com

De Walt Disney Animation Studios, soms ôfkoarte ta WDAS en ek wol oantsjut as Disney Animation, is in Amerikaanske filmstudio dy't fêstige is yn Burbank, ûnder de reek fan Los Angeles, yn it suden fan 'e Amerikaanske steat Kalifornje. It bedriuw, dat troch de jierren hinne ferskate nammen hân hat, waard yn 1923 oprjochte troch de bruorren Walt Disney en Roy O. Disney. It lei him al fan it begjin ôf oan ta op it meitsjen fan tekenfilms, en waard oant fier yn 'e 1980-er jierren rûnom erkend as de meast foaroansteande Amerikaanske tekenfilmstudio, dêr't withoefolle techniken, ideeën en prinsipes ûntwikkele binne dy't letter standertprosedueres foar alle hântekene animaasje wurden binne. Hoewol't de Walt Disney Animation Studios ek koarte tekenfilms en tekenfilmproduksjes foar de tillefyzje meitsje, stiet de studio benammen bekend om 'e produksje fan jûnfoljende tekenfilms fan spylfilmlingte. Ferskaten fan 'e bekendste tekenfilmfigueren fan 'e wrâld binne yn 'e Disney Animation Studios ûntstien, lykas Mickey Mouse, Donald Duck, Goofy en Pluto. Sûnt de 2000-er jierren makket de studio behalven fan hântekene animaasje ek gebrûk fan kompjûteranimaasje.