Cereal

Este artigo trata sobre as plantas gramíneas, para o alimento industrial que se toma de mañá, véxase o artigo Cereal para o almorzo.

Os cereais^[1](da deusa romana da agricultura; Ceres) son plantas que se aproveitan principalmente polos seus grans, que botánicamente denomínase cariópside, o cal ten o endosperma con amidón que se pode transformar en fariña e que se presta a varias preparacións alimentarias (pan, pasta, bicas, etc.), e que tamén son a materia prima para a fabricación de bebidas alcohólicas (cervexa, whisky, sake). Ademais do seu uso dietético e en alimentación animal, sácase aceite deles, especialmente do millo.

En sentido estrito só son cereais algunhas gramíneas pero tamén se adoita a considerar como cereais os grans dalgunhas outras familias cultivadas para consumo humano ou animal. Seguindo esta interpretación estrita hai que considerar só seis cereais: o trigo, o millo, o arroz, a cebada, a avea e o centeo; nun sentido máis amplo, téndese a considerar como cereais o millo miúdo, o sorgo e mesmo o alforfón.^[2]

Actualmente os cereais abastecen a maior parte (45%) das calorías alimentarias da humanidade.^[3]

En termos botánicos os cereais pertencen ás familia poáceas (ou gramíneas). Algúns grans doutras familias botánicas asimílanse ás veces cos cereais: o gran de alforfón (polygonaceae), a quinoa (quenopodiaceae) e o sésamo (pedaliaceae).^[4]

1. ↑ Definicións no Dicionario da Real Academia Galega e no Portal das Palabras para cereal. Consultado o 21-09-2017.
2. ↑ «cereal». L'Enciclopèdia.cat. Barcelona: Grup Enciclopèdia Catalana.
3. ↑ Food and Agriculture Organization of the United Nations (ed.). "FAOSTAT" (en inglés). Arquivado dende o orixinal o 08 de maio de 2009. Consultado o 18 maio 2009. 
4. ↑ Barnola, J. M. S. J. (1908). Manual del botánico herborizador (en castelán). Barcelona: Editorial Manuel Marín.