Cromosoma sexual

Un cromosoma sexual, tamén chamado alosoma, heterocromosoma, cromosoma heterotípico, gonosoma^[1][2] ou idiocromosoma,^[3] é un cromosoma que difire dos cromosomas autosómicos ou autosomas en forma, tamaño e comportamento, e en moitas especies serve para determinar o sexo. Os cromosomas sexuais humanos (e os dos mamíferos en xeral) son o X e o Y, que forman o par sexual, que é XX nas mulleres e XY nos homes. Os autosomas difiren dos alosomas en que os autosomas aparecen nas células diploides en pares e os membros de cada par son idénticos, pero distintos dos membros doutros pares, mentres que os membros do par de alosomas poden ser distintos, como ocorre nos machos dos mamíferos (XY), xa que o cromosoma Y é moito máis pequeno. Os cromosomas sexuais non só levan xenes para determinar o sexo, senón tamén para moitos outros caracteres.

Nettie Stevens e Edmund Beecher Wilson descubriron independentemente os cromosomas sexuais en 1905. Porén, considérase que Stevens os descubriu algo antes que Wilson.^[4]

1. ↑ "Allosome - Biology-Online Dictionary". www.biology-online.org (en inglés). Consultado o 2018-02-22. 
2. ↑ "the definition of allosome". Dictionary.com. Consultado o 2018-02-22. 
3. ↑ "Medical Definition of IDIOCHROMOSOME". i.word.com (en inglés). Consultado o 2018-02-22. 
4. ↑ Brush SG (xuño de 1978). "Nettie M. Stevens and the discovery of sex determination by chromosomes". Isis 69 (247): 163–172. JSTOR 230427. PMID 389882. doi:10.1086/352001.