Roxy Music

Este artigo precisa de máis fontes ou referencias que aparezan nunha publicación acreditada que poidan verificar o seu contido, como libros ou outras publicacións especializadas no tema. Por favor, axude mellorando este artigo.

Roxy Music
Orixe	Londres, Inglaterra
Período	1971 – 1976 1978 – 1983 2001 – presente
Xénero(s)	art rock, glam rock, New Wave, New Romanticism
Selo(s) discográfico(s)	E.G., Virgin
Membros	Bryan Ferry Andy Mackay Paul Thompson Phil Manzanera
Antigos membros	Brian Eno Graham Simpson David O'List Dexter Lloyd Rik Kenton John Porter Eddie Jobson John Gustafson John Wetton Paul Carrack Alan Spenner Gary Tibbs Andy Newmark Neil Hubbard Jimmy Maelen
Artistas relacionados	The Explorers, 801
Na rede
roxymusic.co.uk

Roxy Music é unha banda inglesa de art rock formada en novembro de 1970 por Bryan Ferry, que se converteu no vocalista e principal compositor, e polo baixista Graham Simpson. Os outros membros son Phil Manzanera (guitarra), Andy Mackay (saxofón e óboe) e Paul Thompson (batería e percusión). Antigos compoñentes da banda foron Brian Eno (sintetizadores) e Eddie Jobson (sintetizadores e violín). Malia que o grupo parou as súas actividades en 1983, reuniuse para unha xira no 2001, e veñen tocando xuntos intermitentemente dende entón.

Roxy Music acadou o éxito no Reino Unido, Europa e Australia durante a década de 1970 e comezos da de 1980, comezando co seu álbum de estrea, Roxy Music, publicado en 1972. A banda foi moi influente como principais expoñentes dos elementos máis experimentais e sofisticados do glam, ademais de ser unha influencia significativa no primeiro punk rock británico. Tamén foi un modelo para moitos artistas de New Wave e os grupos de electrónica experimental de principios dos 80. Roxy Music distínguese pola súa sofisticación visual e musical, e a súa preocupación polo estilo e o glamour. Ferry e Eno tamén tiveron unhas influentes carreiras en solitario, converténdose o segundo nun importante produtor nos últimos anos do século XX.

A revista Rolling Stone colocou a Roxy Music no número 98 da súa lista dos 100 mellores artistas de todos os tempos. A súa música estvo influenciada por artistas británicos da época como os Beatles, que era a banda favorita de Ferry, King Crimson, David Bowie, Elton John, Pink Floyd, The Kinks, The Move, The Rolling Stones, Traffic, The Who, The Creation e The Pretty Things. Os "tratamentos" de Eno estiveron influenciados polo so de The Velvet Underground.

Un novo álbum de estudio, que sería o noveno, comezou a gravarse no ano 2005. Tería sido o primeiro traballo da banda con Brian Eno dende 1973, que compuxera dous temas ademais de tocar os teclados. Porén, Bryan Ferry finalmente confirmou que o material gravado nesas sesións sería publicado como un álbum en solitario de Ferry, con Eno tocando nun feixe de cancións, e tamén dixo que non cría que volvesen a gravar como Roxy Music novamente.