Zwjazkowa rada

Zwjazkowa rada (němsce Bundesrat) je jako tak mjenowana „krajna komora“ z lěta 1949 wustawowy organ Zwjazkoweje republiki Němskeje, přez kotrež wobdźěla so zwjazkowe kraje na zakonjedawarstwje (legislatiwje) a zarjadnistwje zwjazka kaž tež w naležnosćach Europskeje unije.

Kóždy kraj je – wotpowědujo swojeje wulkosće – přez zastupjerjow swojeho krajneho knježerstwa w zwjazkowej radźe zastupjeny. Někotre zakonje trjebaja schwalenje přez Zwjazkowu radu, zo bychu nabyli płaćiwosć. Na tamnym boku ma Zwjazkowa rada – kaž Zwjazkowy sejm – prawo, namjetować nowe zakonje abo změny wobstejacych zakonjow. Na te wašnje wobkedźbuja so zajimy krajow w politiskim tworjenju wole cyłkowneho stata. Zwjazkowa rada je tuž wuraz federalizma w Němskej.

Sydło Zwjazkoweje rady je wot lěta 2000 něhdyši pruski „knježi dom“ w Berlinje, do toho tak mjenowany „Zwjazkowy dom“ w Bonnje.

Předsyda Zwjazkoweje rady ma po protokolu štwórte najwyše zastojnstwo w Němskej po zwjazkowym prezidenće, zwjazkowym kanclerje a prezidenće Zwjazkoweho sejma. Wot 1. nowembra 2015 hač do 31. oktobra 2016 bě Stanisław Tilich jako ministerski prezident Sakskeje amtěrowacy předsyda Zwjazkoweje rady.