Back The Bronx AF Þā Bruncs ANG ذا برونكس Arabic ذا برونكس ARZ The Bronx AST Bronks AZ ت برونکس AZB The Bronx BAN Bronx BAR Бронкс BE
The Bronx esas la maxim nordala ek la kin distrikti di New York-urbo, en la usana stato New York.
Ol jacas geografiale sude de komtio Westchester; norde ed este del insulo e distrikto Manhattan trans la rivero Harlem; e norde del distrikto Queens, trans la Esta Rivero.
Ek la kin distrikti, The Bronx esas la unika qua havas la majoritato de sua areo sur la usana kontinento e, kun ter-areo de 109 km2 e habitantaro 1.455.720 en 2016, havas la quaresma maxim granda ter-areo, la quaresma maxim alta habitantaro, e la triesma maxim alta populo-denseso. Depos 1914, The Bronx havas la sama frontieri kam la komtio Bronx, komtio dil stato New York e la triesma maxim dense populoza komtio en la Usa.
The Bronx dividesas da la rivero Bronx aden kolinoza parto weste, proxim Manhattan, e plata estala parto, proxim Long Island. Estala e westala strad-adresi dividesas da Jerome Avenue - la pluduro di Fifth Avenue en Manhattan. West Bronx anexesis a New York-urbo en 1874, e la arei este del Bronx-Rivero en 1895. Komtio Bronx separesis de komtio New York en 1914. Cirkume quarimo del areo di The Bronx esas libera spaco, inkluzanta Woodlawn-Tombeyo, Van Cortlandt-Parko, Pelham Bay-Parko, la Botanikala Gardeno di New York, e Bronx-Zoo. Ica spaci situesas precipue sur tero rezervita en la tarda 19ma yarcento kande urbana developo progresis norde ed este de Manhattan.
La nomo "Bronx" devenas de Jonas Bronck, qua establisis la unesma kolonio en la regiono kom parto di Nova Nederlando en 1639. L'indijeni Lenape diplasesis pos 1643 da koloniani. Dum la 19ma e 20ma yarcenti, The Bronx recevis multa enmigranta grupi e transformesis aden urbana komuneso, unesme de Europana landi (Irlando, Germania, Italia) e pose de Karibia (Porto-Riko, Jamaika, Dominikana Republiko), ultre afrikan-usana enmigranti de suda Usa. Pro la kulturala mixuro The Bronx esas fonto di Latina e hip hop-muziko.
The Bronx kontenas un ek la kin maxim povra kongresala distrikti en Usa, la 15ma distriko, ma ol anke inkluzas richa e meza-richa vicineyi quala Riverdale, Fieldston, Spuyten Duyvil, Schuylerville, Pelham Bay, Pelham Gardens, Morris Park e Country Club. En The Bronx, aparte South Bronx, diminutegis habitantaro, lojeyi e vivo-qualeso en la tarda yari 1960ma e yari 1970ma, kulmininte en ondo de incendio-krimino. Depose eventis ridevelopo di komunesi de tarda la yari 1980ma tra la yari 1990ma til nun.