- Dit artikel is gesjreve in 't Venloos. Ómdat 't plaatsgebónge is, maogs doe 't ómzètte nao 't Árses, es te dit dialek sjpriks.
Brandemeule is e gehuch van Arse in de gemeinte Venlo. 't Leet ingeklemp tösse de Riekswaeg (N271) en de grens mit Pruses. Aan de weskant grens Brandemeule aan 't stedje Arse en 't gehuch Veld, in 't naorde aan 'n aantal vakansieparke en e groeët thermaalbadcomplex, in 't oeëste aan 't Prusische dörp Walbeck en in 't zuje aan Lingsfort.
Brandemeule umvat ca. vieftig huzer mit 125 inwoeëners.[1] De umgaeving is bósriek. Toerisme is dan ouk 'n wiechtige brón van inkómste en 't guuef vuuel campingplaatse en bungalows.