Parochie

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

'n Parochie vörmp binne 'n (katholiek) biesjdóm 'n umsjreve gebied mèt 'n eige kèrk en 'ne pestoar. De parochiane drage bie aan 't ónderhoud van kèrk en de geisteleke. In diezelfde kèrk goon de luuj nao de mès. Es baby zint ze dao geduip en es 8-jaorige höbbe ze dao de communie gedoon. Dèks weurt dao ouch getrouwd.

't Parochiebesjtuur, woavan de pestoar de veurzieter ies, haet de leiding euver de parochie en geuf de nuèdige assistentie bie 't realisere van de zièlzörg van de pestoar en zörg veur de materiëel infrasjtructuur van de parochie. De lede weure op veurdrach van de parochievergadering, dat zin de parochiane, beneump door de biesjop. Tot in de jaor 70 van de 20e ièw kreeg de pestoar dèks assistentie van eine of miè kepläöns. Dat zint ouch geistelike, die gewiejd zin. De take van de keplaon, zint, door 't klein aantal preesterwiejinge, euvergenómme door diakes en leke.

Parochie ies ouch de wereldlike bestuursjeinheid van 't dwergsjtäötsje Andorra.