Liguri Antighi

I Lìguri Antîghi êan 'n pòpolo, tra i prìmmi a êse mensonæ inte l'Òcidénte intrêgo, ch'o stâva inta región conpréiza tra o Ròdano, a Lunigiànn-a e i doî sciànchi de Àrpe de Ponénte. L'òrìgine de sta popolaçión a no l'é conosciûa, co-ina prìmma çitaçión ch'a l'é fæta, fòscia, da l'Ezìodo into sécolo VII prìmma de Crìsto, scibén che-e ciù segûe coménsan sôlo da-i sécoli aprêuvo. Inte l'ùrtima pàrte da seu stöia, mêgio atestâ, i Lìguri Antîghi s'én scontræ ciù vòtte co-a Repùbrica de Rómma p'avardâ a pròpia indipendénsa, vegnìndo in sciâ fìn batûi into sécolo II prìmma de Crìsto, dòppo de lónghe cànpagne de goæra^[1][2].

Inti scrîti da seu época i Lìguri Antîghi són regordæ cómme génte goerezê e mainæ espèrti, spartîi fra de tribù diferénti. Cómme pò-u pòpolo, mànco a seu léngoa, o lìgure antîgo, a gh'à 'n'òrìgine e 'na clasificaçión segûa, co-e pöchìscime testimoniànse che no permétan de determinâne a natûa pre-indoeoropêa ò cèltica. Ste génte chi àn lasciòu o seu nómme a-e tære dónde stâvan che, defæti, pò-u seu çéntro són conosciûe co-o topònimo de Ligùria ancón a-a giornâ d'ancheu^[1][2].

1. ↑ ^{1,0 1,1} (IT) Liguri - Enciclopedia on line, in sce treccani.it. URL consultòu o 2 seténbre 2024.
2. ↑ ^{2,0 2,1} (IT) Adriano Maggiani, Popoli e culture dell'Italia preromana. I Liguri, in Il Mondo dell'Archeologia, Rómma, Istituto della Enciclopedia Italiana, 2004.