Genus (Grammatik)

Dat Genus (Pluraal: Genera; vun latiensch genus Aard, Slecht, na ooldgreeksch γένος génos) oder grammatsche (Ge)slecht is ene grammatsche Kategorie, de vele Spraken bi Substantiven ünnerscheed. Woordaarden so as Artikels, Adjektiven oder Pronomen stemmt meist in dat Genus mit den Substantiv up dat se Betog neemt övereen, so dat grammatsch Slecht höplen kann den Betog twüschen verscheden Wöör klaar to maken.

Plattdüütsch ünnerscheed to’n Bispeel, so as vele anner indoeuropääsche Spraken, dree Genera: maskulin (männlich), feminin (wievlich) un neutrum (saaklich). De dree richt sik een beten na dat Sexus (bioloogsch Slecht), sünd man nich identsch. So een Genussysteem is vergleken recht typsch, man anner Spraken hebbt deelwies heel verscheden Genussystemen un ünnerscheed to’n Bispeel animaat (levig) vs. inanimaat (nich-levig), so as de Algonkin-Spraken, oder minschlich vs. nich-minschlich, so as in den drawidschen Spraken.