Palarong Olimpiko

Marami pong problema ang artikulong ito. Tulungang mapabuti po ito o di kaya'y talakayin ang mga problemang nakasaad sa pahina ng usapan nito. Kinakailangang isulat muli ang artikulong ito. Pag-usapan ang mga pagbabago sa pahina ng usapan. Ang artikulong ito ay nangangailangan ng maayos na salin. (Agosto 2022) Ang artikulong ito ay nangangailangan ng mas marami pang mga kawing sa iba pang mga lathalain upang matugunan ang mga pamantayan pangkalidad ng Wikipedia. Makakatulong ka sa pagpapaunlad ng artikulong ito sa pamamagitan ng pagdaragdag ng mga kawing na may kaugnayan sa kontekstong nasa loob ng umiiral na teksto. Makakakuha ka ng mga mungkahi mula rito. (Agosto 2022)

Palarong Olimpiko
Main topics
IOC Mga NOC Mga pampalakasan Mga punong-abalang lungsod Mga sagisag Mga seremonya Talaang medalya Mga nagkamit ng medalya
Games
Taginit Taglamig Paralimpiko Kabataan Asyano Sinauna
t u b

Ang modernong Palarong Olimpiko (mula Kastila: Olímpico; Pranses: Jeux olympiques, Ingles: Olympic Games) o Olimpiyada (mula Kastila: olimpiada) ay ang nangungunang pandaigdigang palaro. Itinatampok nito ang mga palakasan sa tag-init at taglamig, at dinadaluhan ng libo-libong atleta mula sa iba't ibang panig ng mundo. Kinokonsidera ito bilang isa sa mga pinakamalalaki at pinakasikat na palaro, kung saan lagpas sa 200 bansa at teritoryo ang nakikilahok kada edisyon nito. Ginaganap kadalasan ang Palaro tuwing apat na taon sa isang piniling lungsod, kung saan nagsasalitan kada dalawang taon ang Tag-init at Taglamig sa loob ng panahong ito.

Unang inilunsad ang Palaro noong 1896 sa pangunguna ni Pierre de Coubertin. Inspirasyon ng Palaro ang Sinaunang Palarong Olimpiko (Sinaunang Griyego: Ὀλυμπιακοί Ἀγῶνες) na ginanap sa Olympia, Gresya mula sa ika-8 siglo BKP hanggang sa ika-4 na siglo KP. Ginawa ni Coubertin ang Pandaigdigang Lupong Olimpiko (Ingles: International Olympic Committee, IOC) noong 1894, na nagbigay-daan upang maganap ang unang edisyon ng modernong Palaro noong 1896 sa Atenas. Ngayon, ang IOC ay ang namamahala sa Kilusang Olimpiko, sa patnubay ng Kartang Olimpiko.

Nagbago ang Palaro sa pagdaan ng ika-20 siglo hanggang sa pagpasok ng ika-21 siglo. Kabilang sa mga pagbabagong ito ay ang pagkakaroon ng hiwalay na Palaro para sa mga palakasang para sa taglamig, ang Palarong Paralimpiko para sa mga atletang may kapansanan, ang Palarong Olimpiko ng Kabataan para sa mga atletang edad 14 hanggang 18, ang limang Palarong Kontinental (Pan Amerikano, Aprikano, Asyano, Europeo, at Pasipiko), gayundin ang Palarong Pangdaigdig para naman sa mga palakasang di kasama sa Palaro. Bukod sa mga ito, ineendorso rin ng IOC ang Sordolimpiyada at Special Olympics. Dahil sa pag-usad ng panahon, nangangailangan iangkop ng IOC ang Palaro sa estado ng ekonomiya, pulitika, at teknolohiya. Nilaro ang mga naunang edisyon ng Palaro ng mga amateur, ngunit dahil na rin sa pang-aabuso ng mga bansa sa Silangang Bloc, napilitan ang Palaro na unti-unting payagan ang mga propesyonal na manlalaro sa Palaro, taliwas sa orihinal na konseptong inilatag ni Coubertin. Samantala, sa paglaki ng kahalagahan ng midya sa Palaro, unti-unti ring nagiging komersyalisado ang Palaro. Sa tala ng kasaysayan ng Palaro, tatlong beses pa lang na nakansela nang tuluyan ito, lahat dahil sa dalawang Digmaang Pandaigdig (1916, 1940, at 1944). Sa kabilang banda, isang beses pa lang ito pansamantalang ipinagpaliban sa susunod na taon, noong 2020 (ginanap noong 2021) dahil sa pandemya ng COVID-19.

Binubuo ang Kilusang Olimpiko ng mga pandaigdigang pederasyong pampalakasan (Ingles: international sports federation, mga SF), mga Pambansang Lupong Olimpiko (Ingles: national olympic federation, mga NOC), at ang mga komiteng nag-oorganisa sa bawat edisyon ng Palaro. Bilang ang pangkalahatang kinatawan ng Palaro, ang IOC ang bahala sa pagpili ng magiging punong-abalang lungsod para sa mga susunod na edisyon nito. Sila rin ang bahala sa pag-oorganisa at pagpopondo sa Palaro ayon sa Kartang Olimpiko. Bukod sa mga ito, ang IOC rin ang bahala sa mga palakasang lalaruin sa Palaro. Maraming ritwal at simbolo ang Palaro, tulad ng Watawat at ang Sulo, gayundin ang mga seremonya ng pagbubukas at pagsasara. Sa bawat kompetisyon, nakakatanggap ang nanguna, pumangalawa, at pumangatlo ng ginto, pilak, at tansong medalya, ayon sa pagbanggit.

Mula sa orihinal na 14 na bansang opisyal na naglaro sa Atenas noong 1896, lumobo ang bilang ng mga bansang sumali sa Palaro: 207 bansa ang sumali sa Palaro noong 2016 sa Rio de Janeiro. Kasabay ng paglaki nito ang pag-usbong ng samu't saring mga kontrobersiya, kabilang na ang mga pag-boycott, doping, panunuhol, at isang pag-atake ng mga terorista noong 1972 sa Munich. Gayunpaman, nagbibigay-daan ang Palaro sa mga atleta na sumikat sa kanilang bansa, minsan sa buong mundo. Nagbibigay-daan rin ang Palaro sa mga punong-abalang lungsod at bansa nito na magpakitang-gilas sa mundo.