Flupsdam

D'n Flupsdam ('Ollans: Philipsdam) is 'n deltawêrk. Mee de bouw van de Flupsdam wierren de waeteren Krammer en Volkerak direct afgesloten van de Oôsterschelde. De Flupsdam loôpt van de Grevelingendam nae Flupland. De Flupsdam is bewegwijzerd als N257 die Tole en Flupland verbinde mee Flakkeê en Schouwen. Op 2 feberwari 1987 wierre d'n damme 'eopend. Vanaf 1976 is er an gewerkt. De uutwaeteringssluuzen in de dam bin technisch ingewikkeld deurda 't zoute en 't zoete waeter gescheie mo bluuve.

De dam most het oppervlak van de Oôsterschelde verkleine zoôdat de werken van hoôg en leeg waeter wier versterkt. Een tweêde reden was het maeken van een getievrieje verbinding tussen Rotterdam en Antwerpen. De bouw wier makkelijk gemaekt deurdat de kerieng dichtgezet wier. Bie de Oesterdam is dat ok gebeurd. De dam is zo varde meugelijk nae achter gebouwd zoôdat de schorren van Flupland gespaerd wiere. In de jaeren 1977 en 1978 wier op de Plaete van Vliet een wêrkeiland van 96 ha (0,96 km2) gemaekt. De bouwpit was 19 ha groôt. In totaôl wier ongeveer 370.000 m3 beton gestort waerin 27.000 ton waepeningsiesder wier verwerkt. De sluuzen waere al in 1984 klaer de 'eele dam in 1987.