Banksy

Banksy
'n Weergawe van Banksy se Bomomhelser het in 2007 vir £31 200 verkoop
Gebore	Bristol, England[1]
Bekend vir	Straatkuns
Webwerf	banksy.co.uk pestcontroloffice.com

Banksy is 'n wêreldbekende dog anonieme, Britse kunstenaar, wat veral bekend geword het vanweë sy graffiti. Daar word ook bespiegel dat die Switserse kunstenaar Maître de Casson Banksy kan wees.^[2] Maître de Casson ontken dit op sy webwerf.^[3] Sy werke is dikwels polities of satiries van aard en kan in verskillende Europese stede gevind word. Sy werke is ook al ontdek in die Verenigde State en Palestynse gebiede.

Alhoewel daar baie gissings oor sy ware naam is (Robert of Robin Banks of Robin Gunningham, volgens verskeie bewerings), weet niemand regtig iets van hom af nie. Wat wel bekend is, is dat hy in die vroeë 1990's lid was van die DryBreadZ Crew, 'n graffitibende in Bristol, Engeland. Sy werk het mettertyd in meer stede begin verskyn en is deur meer en meer mense herken en as kuns erken, tot so 'n mate dat die veilingshuis Christy's (in Londen) in 2007 drie van sy werke verkoop het vir £102 000 (Bombardering van Middel-Engeland), £37 200 (Ballonmeisie) en £31 200 (Bomomhelser).

In Junie 2009 het Banksy Bristol verras met 'n geheime tentoonstelling by die Bristol-museum, wat geheel en al deur hom gefinansier word. Nie eers die stad se raadslede (wat die museum besit) het geweet dat 'n Banksy-tentoonstelling opgestel word nie. Die werke wat uitgestal word is nie slegs graffiti nie, maar sluit ook animatronika en onkonvensionele skilderye in.

Dit is egter nie die eerste keer dat hy aandag as 'n waaghals trek nie. Voor hy sy eie tentoonstellings gehou het, het hy self sy werke by bekende museums ingesluip. Dit Britse MuseumTate Britain in Londen en die New Yorkse Metropolitan-museum, Museum van Moderne Kuns, Brooklyn-museum en die Amerikaanse museum van natuurlike geskiedenis het almal al Banksy-werke gehuisves sonder dat hulle daarvan bewus was.^[4][5][6]

Banksy het ook al groot aandag getrek met 'n waagstuk waarin hy 'n poets op die sangeres en sosiale vlinder Paris Hilton gebak het. Met die vrystelling van Hilton se debuutalbum (Paris) in 2006, het Banksy 500 CD's in musiekwinkels regoor die Verenigde Koninkryk omgeruil met 'n CD wat sy eie hermengings bevat en hulle titels gegee soos Why am I Famous?, What Have I Done? en What Am I For?.^[7] Hy het ook die omslae verruil vir 'n gedokterde foto van Hilton waarin sy bostukloos is en die binneblad vir 'n foto waarin sy 'n hond se kop het.

Na Banksy se werk Girl with Balloon op 5 Oktober 2018 vir 'n rekord bedrag van £ 1 042 000 tydens 'n Sotheby's veiling in Londen verkoop is, word die werk onverwags versnipper en sodoende word 'n nuwe kunswerk geskep wat later bekend sou staan as Love is in the Bin.^[8]

1. ↑ (en) "Banksy Unveils Valentine's Day Mural in His Hometown of Bristol". Observer. 14 Februarie 2020.
2. ↑ (en) https://trendkraft.io/kunst-kultur-und-religion/ist-banksy-der-leipziger-maler-maitre-de-casson/
3. ↑ (en) http://www.maitredecasson.com/Banksy.php
4. ↑ (en) Graffiti star sneaks work into Tate, deur die BBC. 17 Oktober, 2003.
5. ↑ (en) Prankster infiltrates NY museums, deur die BBC. 25 Maart 2005.
6. ↑ (en) Cave art hoax hits British Museum, deur die BBC. 19 Mei 2005.
7. ↑ (en) Paris Hilton targeted in CD prank deur die BBC. 3 September 2006.
8. ↑ (en) "Latest Banksy Artwork 'Love is in the Bin' Created Live at Auction". Sotheby's Inc. Besoek op 23 Oktober 2018.