Bariogenese

Bariogenese is in fisiese kosmologie die generiese term vir die hipotetiese fisiese prosesse wat in die vroeë heelal plaasgevind en barion-asimmetrie veroorsaak het, dus die wanbalans tussen barione en antibarione in die waarneembare heelal.

Teorieë oor bariogenese word geskoei op verskillende beskrywings van die wisselwerking tussen basiese deeltjies. Twee belangrike teorieë is elektroswak bariogenese (standaardmodel), wat tydens die elektroswak epog van die Oerknal plaasgevind het, en grootverenigingsbariogenese, wat tydens of net ná die grootverenigingsepog plaasgevind het. Kwantumveldteorie en statistiese fisika word gebruik om sulke moontlike meganismes te beskryf.

Bariogenese is gevolg deur oerknalnukleosintese, toe atoomkerns begin vorm het.