Begraafplaas

'n Begraafplaas is 'n afgeslote gebied waar liggame van oorlede persone begrawe word. Begraafplase het gewoonlik tuine en ander versierings wat lewe simboliseer en hulde aan die afgestorwenes bring. Gedenkmure word ook soms in begraafplase aangebring waarin die veraste oorskot van afgestorwenes geberg word.

'n Begraafplaas word ook soms 'n kerkhof genoem, omdat begraafplase aanvanklik meestal in die hof (= tuin of erf) van 'n kerk aangelê is. Binne die begraafplase vind 'n mens soms 'n sogenaamde kerkhofhuis met begroetings- of afskeidsruimte waar daar kort voor die teraardebestelling aan die oorledene die laaste eer betoon word.