Biotechnologie

D Biotechnologii (griechisch βίος bíos ‚Lääbe‘; au as Sünonüüm zu Biotechnik und churz as Biotech) isch en interdisziplinäri Wüsseschaft, wo sich mit dr Nutzig vo Enzüüm, Zälle und ganze Organisme in technische Aawändige beschäftigt. Iir Ziil isch s nöiji oder effizienteri Verfaare z entwiggle, zum chemischi Verbindige härzstelle, zum Diagnosemethode z entwiggle und anders.^[1][2]

In dr Biotechnologii wärde Erkenntniss us vile Beriich, wie vor allem dr Mikrobiologii, dr Biochemii (Chemii), Molekularbiologii, Genetik, Bioinformatik und de Ääscheniöörwüsseschafte mit dr Verfaaretechnik (Bioverfaaretechnik) gnützt.^[2] D Grundlaage bilde chemischi Reakzioone, wo vo Enzüüm, wo frei si oder sich in Zälle befinde, katalysiert wärde (Biokatalyse oder Biokonversion).

Klassischi biotechnologischi Aawändige si scho vor Joorduusige entwigglet worde, wie z. B. d Härstellig vo Wii und Bier mit Hefi und d Verarbäitig vo Milch z verschiidene Lääbesmiddel mit Hilf vo bestimmte Mikroorganisme oder Enzüüm.^[2] Die modärni Biotechnologii grift sit em 19. Joorhundert mee und mee uf mikrobiologischi und sit dr Middi vom 20. Joorhundert au immer mee uf molekularbiologischi, genetischi bzw. gentechnischi Erkenntniss und Methode zrugg. Eso wird s mööglig, Härstelligsverfaare für chemischi Verbindige, z. B. as Wirkstoff für d Farmazöitik oder as Grundchemikalie für die chemischi Industrii, Diagnosemethode, Biosensore, nöiji Pflanzesorte und anders z entwiggle.^[1][2]

Biotechnologischi Verfaare chönne vilfältig in de underschiidlichste Beriich aagwändet wärde. Zum Däil brobiert mä, die Verfaare noch Aawändigsberiich z sortiere, wie z. B. Medizin (Rooti Biotechnologii), Pflanze bzw. Landwirtschaft (Grüeni Biotechnologii) und Industrii (Wissi Biotechnologii).^[1]

1. ↑ ^{1,0 1,1 1,2} biotechnologie.de Was ist Biotechnologie? (Memento vom 10. Februar 2015 im Internet Archive), Informationssite vom BMBF, abgrüeft am 22. Februar 2010.
2. ↑ ^{2,0 2,1 2,2 2,3} Nachhaltige Bioproduktion: Biotechnologie (Memento vom 20. Septämber 2005 im Internet Archive), Förderschwerpunkt des BMBF: Nachhaltige Bioproduktion, Informationsseite des Projektpartners Forschungszentrum Jülich, abgrüeft am 22. Februar 2010.