Ice-T

Dr Ice-T (* 16. Februar 1958 z Newark/New Jersey USA als Tracy Marrow) isch e bekannte Rapper und Schauspiler. Är bezaichnet sich sälber als "inventor of crime rhyme", und si wichtigi Rolle als Pionier vom Gangster Rap isch unbeschtritte. Sit sim zwaite Album "Power" (1988) hed är immer wider au bolitischi Täggscht gschribe. Är hed scho frie au als Schauspiler gschafft (zersch als Rapper in de Film "Breakin'" und "Breakin' 2 - Electric Boogaloo"); schliesslig hed er in "New Jack City" vom Mario Van Peebles e Hauptrolle übernoo. Wyteri Rolle in Film vom Abel Ferrara und andere hed zwor nid zum groosse Erfolg als Kino-Schauspieler gfiert; derfür hed er sich au als TV-Schauspieler könne etabliere, unter anderem in "Players" und "Law and Order".

Är hed au e Heavy Metal-Band namens Body Count; ir Lied "Cop Killer" hed zum Skandaal gfiert und dr Ice T hed si Blattevertraag bi Warner Brothers verlore.

Dr Ice T isch au Mitglid vo de Gruppe Analog Brothers und SMG. Sy Posse oder Crew haisst Rhyme Syndicate. Vili ehemologi Mitglider vom Syndicate sin hüt bekannti Rapper, unter anderem d Nikki D und dr Everlast.