Monsun

Dr Monsun (vo arabisch موسم ‎ mausim ‚Jooreszit‘) isch e groossrüümigi Luftzirkulazioon vo dr undere Troposfääre im Gebiet vo de Troope und Subtroope im Iiflussberiich vo de Passatwind. S Hauptmerkmol vom ene Monsun si d Monsunwind, wo d Richdig von ene seer stabil isch, und dass sich die hüfigsti Windrichtig im Lauf vom ene Joor zwäimol umcheert.

D Monsunwind und au dr Monsun as sonige wärde hauptsächlig dur d Wanderig vom Zenitstand vo dr Sunne zwüsche de Wändikräis, de underschiidlige Erwermigs- und Abchüeligsäigeschafte vo verschidnige Ooberflechene vo dr Ärde und dr Windablänkig wäge dr Coriolischraft verursacht.

Am sterkste usbrägt isch dr Monsun im Ruum vom Indische Ozeans, vor allem in Bezug uf e indisch, aber au uf e nordaustralisch und ostafrikanisch Monsun.

Dr Monsun het vor allem wäge dr hooche Luftfüechtikäit, wo d Monsunwind im Summer mit sich füere, e starke Iifluss uf s summerfüechte Klima in de Regione, wo von em betroffe si. Mä bezäichnet das doorum au as Monsunklima. Mäistens isch es mit eme usbrägte Monsunrääge und eme Monsunwald verbunde. Us däm seer starke Iifluss uf e Naturruum läitet sich die hoochi wirtschaftligi und au kulturgschichtligi Bedütig vor allem vom indische Monsun ab.