Sanger

'n Sanger is 'n persoon wat die sangkuns beoefen. 'n Sanger kan professioneel of vir 'n stokperdjie sing.

Iemand wat sang as 'n beroep beoefen, word ook 'n vokalis genoem. Omdat die verskillende musiekstyle elkeen hul eie vokale tegniek vereis, spesialiseer die meeste sangers in een of 'n paar style, soos opera, die klassieke liedere, jazz of pop. Daar kan ook verskillende soorte sang voorkom binne musiekstyle, soos belcanto, keelsang, knor, kletsrym (rap), die gebruik van die falsetto en spraaksang.

Sangers kan optree in 'n verskeidenheid funksies, benewens die verskaffing van vermaak, soos die bevordering van leiers, die behoud van tradisionele verhale (die Wes-Afrikaanse griot), die oordra van nuus of die uiting van idees (die protessanger). Historiese voorbeelde sluit in die bard, die troebadoer en die marksanger. Verskillende godsdienste het voorsangers wat die godsdienstige tekste of gebede opsê of sing (soms gekombineer met gemeentesang), soos die Joodse chazan in die sinagoge, terwyl die muezzin Moslems gewoonlik op melodieuse wyse tot gebed roep.

Sangers kan ingedeel word volgens toonhoogte, soos sopraan, alt, tenoor of bas. Sangers kan begelei word deur musiekinstrumente. Gesang sonder instrumentbegeleiding word "a cappella" genoem.