Sevilla

Sevilla
NO8DO (es)	Escudo de Sevilla (es)
Alministración
País	España
Autonomía	Andalucía
Provincia	provincia de Sevilla
Tipu d'entidá	conceyu d'España
Alcalde de Sevilla	Juan Espadas Cejas
Nome oficial	Sevilla (es)
Nome llocal	Sevilla (es)
Códigu postal	41000–41099
Xeografía
Coordenaes	37°23′19″N 5°59′44″W / 37.3886°N 5.9956°O
	Sevilla Sevilla (España)
Superficie	140.8 km²
Altitú	18 m
Llenda con	Alcalá de Guadaíra, La Algaba, Camas, Carmona, Dos Hermanas, Gelves, La Rinconada, Salteras, San Juan de Aznalfarache, Santiponce, Tomares y Palomares del Río
Demografía
Población	684 025 hab. (2023); - 326 634 homes (2019); - 361 958 muyeres (2019)
Porcentaxe	34.95% de provincia de Sevilla
Densidá	4858,13 hab/km²
Xentiliciu	sevillanu (masculín singular); sevillana (femenín singular); sevillano (xéneru neutru); sevillanes (femenín plural); sevillanos (masculín plural)
Más información
Prefixu telefónicu	95
Estaya horaria	UTC+01:00 (horariu estándar); UTC+02:00 (horariu de branu)
Llocalidaes hermaniaes	Angers, Baler, Tarija, Barcelona, Buenos Aires, Columbus, Guadalajara, L'Habana, Kansas City, Rabat, Tifariti (es) , Ciudad Ho Chi Minh, Cracovia, Cartagena de Indias, Caltanissetta, Roma, Xerez de la Frontera, Kansas City, Popayán, Isla Cristina, Berlín, Iquique y Rostov del Don
	sevilla.org

Sevilla^[4] ye un municipiu y ciudá española, capital d'Andalucía y de la provincia de Sevilla. Ye, colos sos 684 025 habitantes (2023)^[5]^[6] la cuarta ciudá más poblada del país, tras Madrid, Barcelona y Valencia. El so conceyu, de 140,8 km², d'estensión, ta comprendíu dientro del área metropolitana de la ciudá, formada por 46 conceyos qu'axunten 1.508.605 habitantes nos sos 4.535,78 km² d'estensión.

El so cascu históricu ye, coles sos 335 ha d'estensión, ún de los mayores d'España. Ye bayurosu en monumentos, y eso, xunto cola abondanza d'espacios escénicos y culturales, fai de la ciudá un destín turísticu perimportante. Ente los sos monumentos, que dalgunos foron declaraos Patrimoniu de la Humanidá pola UNESCO en 1987, rescamplen la Xiralda, la Catedral, l'Alcázar, l'Archivu d'Indies y la Torre del Oro.

El so puertu ye l'únicu puertu fluvial d'España. D'ellí al océanu Atlánticu'l ríu Guadalquivir percuerre 80 km, toos navegables. El tamañu de los barcos qu'aporten al puertu ta llimitáu por una presa que permite un caláu máximu de 8,5 m; el caláu aereu máximu, determináu pela ponte de circunvalación nomada V Centenario, ye de 42 m. Amás d'elli, la ciudá ta perbién comunicada, per tren (convencional y d'alta velocidá) y per carretera, col restu del país. Tien, tamién, un aeropuertu internacional. Tocántenes a la industria, hai que destacar la industria aeronáutica y militar, y tamién los sos astilleros.

El so desarrollu urbanísticu recibió un emburrión importante cola celebración de la Esposición Iberoamericana de 1929. P'aguapar la ciudá ficiéronse d'aquella conxuntos arquiteutónicos y parques tan nomaos anguaño como'l conxuntu d'edificios de la plaza d'España o el parque María Luisa. Años dempués, con motivu de la Esposición Universal de 1992, ameyoráronse enforma les infraestructures, tanto aeronáutiques como ferroviaries (abriose l'AVE que comunica la estación de Santa Justa cola madrilana d'Atocha, que foi'l primeru d'España). En pasando aquella lliberáronse bien de terrenos yá urbanizaos que foron aprovechaos pa instalar empreses de nueves teunoloxíes, facultaes universitaries y el parque temáticu Islla Mágica.

La Universidá de Sevilla, fundada en 1505 y con más de 55.000 estudiantes, ye (xunetu 2011) la primera más importante d'España y la 116ª del mundu según un ránking de baremación internacional^[7]. Nel municipiu vecín de Dos Hermanas hai otra universidá, la Universidá Pablo de Olavide, que tien 10.000 estudiantes.