Sklentenn

Ur sklentenn zo un daolennig evit skrivañ warni. Graet e vez gant un pezh tanav eus un danvez kalet ha plaen, e sklent peurliesañ pe en ur c'hevanaozad (ar merk Velleda da skouer). Sterniet e vez gant koad pe vezell.

En implij e oa ar sklentennoù kerkent hag ar Grennamzer. Dont a rejont war-lerc'h tablezennoù koar an Henamzer. Benveg kentañ ar skolidi e teujont da vezañ eus an XIX^vet kantved betek kreiz an XX^vet kantved evit ober poelladennoù skrivañ, jediñ ha tresañ, en amzer ma oa ker ar paper c'hoazh. Skolidi ar c'hentañ derez a ra ganto c'hoazh hiziv.

Gant un tamm kleiz e reer evit skrivañ warni, e gwenn an aliesañ, pe gant stiloioù feltr war ur sklentenn e kevanaozad. Diverkañ a reer aes gant ur bilhenn, ur spoueenn c'hleb pe ur broust.

Implijet e vez ar sklentennoù gant an oadourien ivez, er stalioù hag er pretioù evit diskouez roll-meuzioù an deiz. Sklentennoù e kevanaozad e vez implijet ivez gant ar splujerien evit kehentiñ kenetrezo en dour.

• 
  Ar skoliadez gant Karl Hermann Schellbach (1850-1921)
• 
  Ur sklentenn gant he spoueenn
  (war-dro 1950)
• 
  Taol-skrivañ kozh ur skoliad, e sklentenn lakaet warni