Strofe

'n Strofe is 'n onderdeel van 'n gedig en bevat gewoonlik 'n sekere gedagte-eenheid. Die uiterlike kenmerk van die strofe is dat daar 'n leë reël (of sogenaamde witreël) voor en na die strofe is.

'n Strofe in 'n gedig kan vergelyk word met 'n paragraaf in 'n teks. Die strofe word ook soms 'n vers genoem, al is dit baie verwarrend, omdat met 'n vers gewoonlik verwys word na éen reël. In 'n liedteks word die strofe ook 'n koeplet genoem om dit van die refrein te onderskei. Die woord strofe kom van die Griekse woord στροφη en beteken letterlik "wending".^[1][2]

Besondere vorme van die strofe het aparte name. So heet

• 'n tweereëlige strofe 'n distigon of distichon
• 'n driereëlige strofe 'n tersine of terset (in 'n sonnet)
• 'n vierreëlige strofe 'n kwatryn
• 'n vyfreëlige strofe 'n kwintyn of kwintet
• 'n sesreëlige strofe 'n sekstet
• 'n sewereëlige strofe 'n septet
• 'n agtreëlige strofe 'n oktaaf
• 'n negereëlige strofe 'n novet

Oor die algemeen staan 'n strofe van vyf of meer reëls bekend as 'n stanza.^[3]

1. ↑ William S. Annis. Introduction to Greek Meter. Aoidoi.org January 2006. Bladsy 11.
2. ↑ Edwin D. Floyd. "Some more or less technical observations on Greek rhythm." class material for University of Pittsburgh: Classics 1130. http://www.pitt.edu/~edfloyd/Class1130/strophe.html besoek op 6 Januarie 2015.
3. ↑ Cushman, Stephen; Cavanagh, Clare; Ramazani, Jahan; Rouzer, Paul, reds. (2012). "Strophe". The Princeton Encyclopedia of Poetry and Poetics (4de uitg.). Princeton, NJ: Drukpers van Princeton-universiteit. p. 1360.