Traagheidsmoment

Traagheidsmoment is die mate waartoe 'n voorwerp traag is om rondom 'n as te versnel, en word dikwels voorgestel deur die letter I.

Volgens Newton se eerste bewegingswet, sal 'n voorwerp in rus bly of teen dieselfde lineêre snelheid beweeg tensy 'n eksterne netto krag daarop uitgeoefen word – die voorwerp se massa bied dus 'n traagheid om te versnel in 'n lineêre rigting. Traagheidsmoment kan gesien word as 'n analoog van hierdie traagheid van massa, maar wel op 'n voorwerp wat roteer. Dus sal 'n voorwerp wat rondom 'n as roteer in rus bly of teen dieselfde hoeksnelheid beweeg tensy 'n eksterne moment (of aksie wat rotasie veroorsaak) daarop inwerk.

In algemene fisika is die definisie van 'n moment 'krag maal afstand',^[1] en kan gesien word as enige aksie wat sal veroorsaak dat 'n voorwerp (of deeltjie binne in 'n voorwerp) rondom 'n as wil roteer. Die traagheidsmoment op enige deeltjie van 'n voorwerp is weer die massa van die deeltjie maal met die kwadraat van afstand van die as (of sentroïede) af. Die som van al die deeltjies se traagheidsmomente tel bymekaar om die traagheidsmoment van die totale voorwerp rondom die as te bepaal. Dus:

${\displaystyle I=\sum _{i}m_{i}r_{i}^{2}}$.

waarin

• ${\displaystyle I\,}$: traagheidsmoment [eenheid kg.m²]
• ${\displaystyle m_{i}\,}$: massa van deeltjie i [eenheid kg]
• ${\displaystyle r_{i}\,}$: afstand van deeltjie i vanaf die as [eenheid m]

Hoe verder 'n deeltjie dus van die as van die voorwerp af geleë is, hoe groter sal die bydrae tot die traagheidsmoment wees.

Molekules in die gasfase kan vrylik roteer en hierdie rotasies is gekwantiseer. Oorgange tussen die verskillende rotasietoestande kan deur absorpsie van mikrogolwe waargeneem word en daardeur kan die molekule se traagheidsmomente bepaal word. (Daar is soms meer as een, as die deeltjie 'n vorm met lae simmetrie besit.)

1. ↑ Allen, JH. 2010. Statics for dummies. John Wiley and Sons