Wilusa

Este artigo precisa de máis fontes ou referencias que aparezan nunha publicación acreditada que poidan verificar o seu contido, como libros ou outras publicacións especializadas no tema. Por favor, axude mellorando este artigo.

Wilusa ou Wiluša foi un reino da rexión da Tróade, en Anatolia, a miúdo confederado con Arzawa (que era unha rexión formada polo menos por cinco reinos ás veces confederados e outras non: Arzawa propia, Mira, Hapalla, Río Seha, e Wilusa). Foi a homérica Ilios ou Ilión, probabelmente na rexión da Tróade, pero sen incluír Troia, que debía de ser un estado separado (Troia en hitita = Taruisa ou Taruiša).

Arzawa foi sometida temporalmente polo rei hitita Hattusilis I na segunda metade do século –XVII, pero non tardou en recuperar a independencia. Pero Wilusa, tamén sometida seguramente ao mesmo tempo, permaneceu aliada aos hititas como se testemuña polos agasallos enviados periodicamente desde Wilusa ao rei hitita. O gobernante en tempo de Suppiluliumas I era Kukkuni, identificado como o grego Kyknos, rei de Colonas na Tróade e heroe da guerra de Troia, fillo de Poseidón, que, segundo a lenda, foi morto por Aquiles, co que se mantiveron boas relacións.

Wilusa estivo casualmente aliada a Arzawa nos últimos momentos deste reino. Ao cabo da guerra, extinguido o reino de Arzawa, o rei hitita Mursilis II fixo un tratado co gobernante de Wilusa chamado Alaksandu (Alexandre) que fora adoptado como sucesor por Kukkuni, e restableceuse a amizade entre os dous estados.

A guerra civil entre Mursilis III e Hattusilis III produciu de feito a independencia de Wilusa, pero, ao final do reinado de Hattusilis III, xa volvía a ser aliada do reino hitita.