IUSTC

IUSTC,^[1] die Internasionale Unie van Suiwer en Toegepaste Chemie (Engels: IUPAC International Union of Pure and Applied Chemistry) is 'n internasionale organisasie wat die wêreldwye aspekte van die chemiese wetenskappe wil bevorder en wil bydra tot die toepassing van die chemie in diens van die mensdom.^[2]

Die nie-regeringsorganisasie is in 1919 gestig deur chemici vanuit die industrie en die akademiese wêreld. Dit word algemeen erken as die outoriteit op die gebied van naamgewing en standardisasie in die chemie. Die lede van IUSTC is die nasionale chemieverenigings. Die organisasie is die bekendste daarvoor dat hulle die standaarde ontwikkel vir die benaming van chemiese elemente en hul verbindings, deur hul Komitee vir Nomenklatuur en Simbole (IUSTC-nomenklatuur). Die organisasie is ook 'n lid van die Internasionale Raad vir Wetenskap.

Behalwe vir die daarstel van nomenklatuur-riglyne is die organisasie ook verantwoordelik vir daarstel van internasionale spelstandaarde in die geval waar geskille mag bestaan; daar is byvoorbeeld bepaal dat die internasionale spelling van aluminium verkieslik is bo die Amerikaanse aluminum en dat die Amerikaanse spelling vir sulfur verkieslik is bo die Britse sulphur.

Baie IUSTC-publikasies is op die Internet verkrygbaar. Die boek – Quantities, Units and Symbols in Physical_Chemistry kan byvoorbeeld in sy geheel afgelaai word en die Compendium of Chemical Terminology kan aanlyn deursoek word.

'n Belangrike IUSTC-bylaag ("Recommendations for nomenclature and tables in biochemical thermodynamics, 1994") is by Queen Mary Universiteit van Londen se webwerf beskikbaar.^[3]

1. ↑ "Tyskrif vir Natuurwetenskap en Tegnologie 6 (4) 1987". Geargiveer vanaf die oorspronklike op 10 Januarie 2016.
2. ↑ "IUPAC se webwerf" (in Engels). Geargiveer vanaf die oorspronklike op 14 Desember 2012. Besoek op 16 Januarie 2016.
3. ↑ "Queen Mary University of London". Chemistry (in Engels). Besoek op 28 Julie 2020.