Propertius

Propertius
Propertius en Cynthia by Tivoli (Auguste Jean Baptiste Vinchon).
Naam	Sextus Propertius
Geboorte	Tussen 50 en 45 v.C. Assisium (Assisi)
Sterfte	Kort ná 15 v.C.
Beroep	Digter
Genre(s)	Treurdigte
Bekendste werke	Elegiae

Sextus Propertius was ’n Latynse treurdigter uit die Augustynse tydperk. Hy is tussen 50 en 45 v.C. in Assisium (nou Assisi) gebore en is kort ná 15 v.C. dood.^[1]

Propertius se werk wat bewaar gebly het, sluit vier boeke Elegiae (treurdigte) in. Hy was ’n vriend van die digters Gallus en Vergilius en deur hulle het hy die beskermheer Maecenas gehad, en deur Maecenas keiser Augustus. Hoewel Propertius nie in sy tyd so bekend was as ander Latynse treurdigters nie,^[2] beskou geleerdes hom vandag as een van die groot digters.^[3][4]

Baie min is bekend oor die lewe van Propertius buiten sy eie skryfwerk, maar die algemene voorkoms van obskure mitologie in sy gedigte dui daarop dat hy ’n goeie opvoeding gehad het. Uit die gereelde noem van vriende soos Tullus,^[5] die nefie van Lucius Volcatius Tullus (konsul in 33 v.C.), en sy gesogte woonplek is dit duidelik hy het tussen die kinders van die rykes beweeg en politieke verbintenisse gehad in die vroeë deel van 20's v.C. Dit was in dié tyd dat hy Cynthia ontmoet het, die ouer vrou^[6] wat hom sou inspireer om ’n poëtiese genie te word.

1. ↑ John Lemprière se Classical Dictionary
2. ↑ Thorsen, Thea S. (2013). The Cambridge Companion to Latin Love Elegy. Cambridge University Press. p. 97. ISBN 0521765366.
3. ↑ Tarrant, Richard (2016). Texts, Editors, and Readers: Methods and Problems in Latin Textual Criticism. Cambridge University Press. ISBN 131653880X.
4. ↑ Fain, Gordon L. (2010). Ancient Greek Epigrams: Major Poets in Verse Translation. University of California Press. p. 119. ISBN 0520265793.
5. ↑ e.g. I.1.9, 6.2, 14.20 en 22.1
6. ↑ cf. II.18.19