Sneeustorting

'n Sneeustorting is 'n groot hoeveelheid sneeu wat teen 'n berg afgly of aftuimel. Dit is soortgelyk aan 'n rotsstorting of 'n modderstorting. Sneeustortings wissel aansienlik in grootte, afhangende van die plaaslike sneeutoestande, maar groot sneeustortings kan hele dorpies toespoel, met aansienlike lewensverlies. Die oorsake van sneeustortings en die faktore wat hul grootte en spoed bepaal is ingewikkeld, en hul voorspelling bly steeds beperk. In Engels staan dit bekend as 'n avalanche.

Sneeustortings word tipies veroorsaak by 'n beginsone van 'n meganiese opbreek in die sneeupak, indien die laste op die sneeu sy sterkte oorskry, maar soms is dit net a.g.v. 'n geleidelike verwyding van sneeu (los sneeustorting). Na sy aanvang, versnel sneeustortings geweldig vinnig en vergroot in massa en volume soos dit meer sneeu versamel. As die storting vinnig genoeg beweeg, kan 'n deel van die sneeu met die omliggende lug meng, wat dan 'n poeiersneeustorting vorm.

Die las op die sneeupak mag slegs as gevolg van swaartekrag wees, in welke geval beweging kan volg weens verswakking van die sneeupak of die verhoogde lading weens neerslag. Hierdie staan bekend as spontane sneeustortings. Sneeustortings kan ook deur ander laste veroorsaak word, soos skiërs, sneeuskrapers, diere of plofstof. Seismiese aktiwiteit kan ook die opbreek van die sneeupak en sneeustortings aktiveer. 'n Algemene mite is dat sneeustortings deur harde geraas of 'n geskreeu veroorsaak kan word, maar die drukking van klank is te klein om 'n sneeustorting te aktiveer.