Spoetnik 7

Spoetnik 7 of Tjazjoli Spoetnik (Russies: Тяжёлый Спутник; Swaar Satelliet), ook bekend as Wenera 1WA No. 1, was ’n Sowjet-ruimtetuig. Dit is op 4 Februarie 1961 van Terrein No. 1 by die 5de Tjoeratam-lanseersentrum (nou Baikonoer) in die Kazachstanse Sosialistiese Sowjetrepubliek gelanseer^[1] en was veronderstel om die eerste ruimtevlug te wees om die planeet Venus te verken.

Weens ’n tegniese fout het Spoetnik 7 egter nooit sy lae wentelbaan verlaat nie. Dit het die aarde se atmosfeer op 26 Februarie 1961 oor Siberië binnegedring.^[2] In ’n poging om die mislukking van die ruimtesending te ontken het die Sowjet-regering aangekondig dat die tuig ’n toetsvlug was vir ’n "swaar satelliet" wat sou dien as lanseerplatform vir toekomstige sendings.

Nog ’n tuig, die Wenera 1, is ’n week later suksesvol in ’n heliosentriese wentelbaan na Venus geplaas, maar die instrumente het ’n week later foutief geraak.

Wikimedia Commons bevat media in verband met Spoetnik.

1. ↑ McDowell, Jonathan. "Launch Log". Jonathan's Space Page. Geargiveer vanaf die oorspronklike op 24 Oktober 2019. Besoek op 28 Julie 2010.
2. ↑ "Sputnik 7" (in Engels). NSSDC (NASA Goddard Spaceflight Center). Geargiveer vanaf die oorspronklike op 16 Desember 2016. Besoek op 28 Julie 2010.