Tirus

Tirus
Onderwater pilare, met die moderne stad op die agtergrond.
Plaaslike naam	صور, Ṣūr (Arabies) Tyr (Frans) Sour (Libanese Frans)
Land	Libanon
Soort	Stad
Streek	Goewernoraat Suid-Libanon
Oppervlakte	16,7 km2
Geskiedenis
Gestig	c. 2750 v.C.
Bewoners	174 000
Unesco-wêrelderfenisgebied
Tipe	Kultureel
Kriteria	iii, vi
Verwysing	299
Inskripsie	1984 (8ste sessie)
Beskrywing*	Stad en distrik Tirus, goewernoraat Suid-Libanon
* Naam soos op die Wêrelderfenislys

Tirus (Arabies: صور Ṣūr; Frans: Tyr; Grieks: Τύρος Tyros) is een van die oudste aaneenlopend bewoonde stede in die wêreld,^[1] hoewel dit ’n paar eeue in die Middeleeue net ’n klein inwonertal gehad het. Dit was een van die eerste Fenisiese stede en die legendariese geboorteplek van die Fenisiese prinses Europa, haar broers Cadmus en Phoenix, sowel as Kartago se legendariese stigter, Dido (Elissa).

Herodotos het Tirus omstreeks 450 v.C. besoek en gesê volgens die plaaslike priesters is die stad omstreeks 2750 v.C. gestig.^[2] Volgens argeologiese bewyse was egter reeds omstreeks 2900 v.C. nedersettings op die terrein. Die stad het baie antieke terreine, soos ’n hippodroom, en kom as geheel voor op Unesco se lys van wêrelderfenisgebiede.^[3] Die historikus Ernest Renan het gesê: "'n Mens kan Tirus ’n stad van ruïnes noem wat van ruïnes gebou is."^[4][5]

Die Bybel verwys verskeie kere na Tirus, veral in Jesaja 23, waar die stad se ondergang voorspel word. Koning Hiram I was ’n tydgenoot van Dawid en Salomo. Jesus het ook die streke Tirus en Sidon besoek.

Tirus is vandag die grootste stad in Libanon naas Beiroet, Tripoli en Sidon.^[6] Dit is sowat 80 km suid van die hoofstad, Beiroet, geleë. Dit het aanvanklik uit twee afsonderlike gebiede bestaan: 'n eiland naby die kus en ’n verwante nedersetting op die vasteland. Alexander die Grote het in 332 v.C. 'n straatweg laat bou om die eiland met die vasteland te verbind en Tirus vorm dus nou 'n skiereiland.

Tirus is die hoofstad van die Tirus-distrik in die goewernoraat Suid-Libanon. In die stedelike gebied was daar in 2006 sowat 200 000 inwoners. Dit sluit baie vlugtelinge in, omdat drie van die land se 12 Palestynse vlugtelingkampe in Tirus geleë is.^[7] Buite die moderne stad lê ’n argeologiese terrein met oorblyfsels van die antieke stad.

Tirus het ’n Mediterreense klimaat met warm somers. Dit is ses maande per jaar droog, met ’n jaarlikse gemiddelde temperatuur van 20,8 °C. Die reënval is gemiddeld 645 mm per jaar.

1. ↑ "The world's 20 oldest cities". The Telegraph. 30 Mei 2017. Besoek op 25 Maart 2020.
2. ↑ Verwysingfout: Invalid <ref> tag; no text was provided for refs named :29
3. ↑ "World Heritage List: Tyre". United Nations Educational, Scientific and Cultural Organization. 2020. Besoek op 13 Maart 2020.
4. ↑ Medlej, Youmna Jazzar; Medlej, Joumana (2010). Tyre and its history. Beiroet: Anis Commercial Printing Press s.a.l. pp. 1–30. ISBN 978-9953-0-1849-2.
5. ↑ Finlay, Victoria (2014). Colour: Travels Through the Paintbox. Londen: Hachette UK. ISBN 9780340733295.
6. ↑ Tyre City, Lebanon
7. ↑ Maguire, Suzanne; Majzoub, Maya (2016). Osseiran, Tarek (red.). "Tyre City Profile" (PDF). reliefweb. UN HABITAT Lebanon. pp. 12, 16, 33–34, 39–43, 57, 72. Besoek op 29 Oktober 2019.